პოპის პრინცესად წოდებული ბრიტნი სპირსის ავტობიოგრაფიული წიგნი ამ შემოდგომით გამოიცემა. წიგნს, სახელწოდებით ქალი ჩემში, მომღერლის ფანები განსაკუთრებულად ელოდებიან, რადგან მასში სპირსი მეურვეობის გახმაურებულ საქმესაც შეეხება.

ფოტო: Gallery Books

"ჩემი წიგნი ძალიან მალე გამოვა", — ამბობს პოპვარსკვლავი გავრცელებულ ვიდეოში, — "ამ წიგნზე ბევრი ვიმუშავე, მის დასასრულებლად კი ფსიქოლოგთან არაერთი სეანსიც დამჭირდა. ასე რომ, იმედია, მოგეწონებათ. თუმცა, თუ არ მოგეწონებათ, არც ეგაა პრობლემა".

მას შემდეგ, რაც პოპვარსკვლავი სასამართლომ მამის 13-წლიანი მეურვეობისგან გაათავისუფლა, ბრიტნის ავტობიოგრაფიული წიგნის გამოცემის უფლების მოსაპოვებლად რამდენიმე გამომცემლობა იბრძოდა. საბოლოოდ, ეს უფლება Simon & Schuster-ის შვილობილმა კომპანია Gallery Books-მა მოიპოვა.

"ბრიტნის ჩვენებებმა სასამართლოზე მსოფლიო შეძრა, კანონები შეცვალა, მისი შთამაგონებელი სიძლიერე და შეუპოვრობა გამოაჩინა", — ამბობს Gallery Books-ის წარმომადგენელი, — "ეჭვი არ მეპარება, რომ მის ავტობიოგრაფიულ წიგნსაც მსგავსი ეფექტი ექნება. ვამაყობთ, რომ ბრიტნის საკუთარი ისტორიის მოყოლაში ვეხმარებით".

საკუთარი ისტორიის მოყოლა კი სპირსს ნამდვილად უნდოდა. ერთ-ერთ სასამართლო სხდომაზე მან განაცხადა, რომ მხოლოდ ის სურდა, "თავისი ცხოვრება დაებრუნებინა" და მსოფლიოსთვის გულწრფელად მოეყოლა ყველაფერი.

Gallery Books-ის გავრცელებული პრესრელიზიდან კი ასევე ვიგებთ, რომ სპირსის ავტობიოგრაფია "გაბედული და გასაოცრად ამაღელვებელი ამბავია თავისუფლებაზე, პოპულარობაზე, დედობაზე, გადარჩენაზე, რწმენასა და იმედზე".

ბრიტნი სპირსის ქალი ჩემში 24 ოქტომბერს გამოიცემა.

ასევე იხილეთ: