მთავრობის დღევანდელ სხდომაზე პრემიერმინისტრი გიორგი კვირიკაშვილი საკონსტიტუციო ცვლილებებს გამოეხმაურა, რომელიც ვენეციის კომისიის პრეზიდენტმა ჯანი ბუკიკიომ გუშინ გააკრიტიკა:

"ჩვენ გვექნება კონსტიტუცია, რომელიც სწორედ ჩვენი გუნდის პოლიტიკური ნებით დაიხვეწა და აბსოლუტურ შესაბამისობაში იქნება ყველაზე მაღალ დემოკრატიულ სტანდარტებთან, რომლებიც დღეს არსებობს მსოფლიოში და განსაკუთრებით ევროპაში".

პრემიერი ყველაზე მთავარ გადაწყვეტილებად ქვეყნის პროპორციულ საარჩევნო სისტემაზე გადასხვლას მიიჩნევს:

"ცვლილებებით, რომლებსაც ითვალისწინებს ახალი კონსტიტუცია, პირდაპირ არის გაწერილი დაბალანსებული ძალთა გადანაწილება მთავრობასა და პარლამენტს შორის; მნიშვნელოვნად იზრდება პარლამენტის როლი; მნიშვნელოვნად არის გამარტივებული მთავრობისთვის უნდობლობის გამოცხადების პროცედურები, რაც აბსოლუტურად გაუგებარი იყო არსებულ კონსტიტუციაში და მორგებული იყო წინა პოლიტიკურ გუნდზე; ასევე, იმ გადაწყვეტილების გამო, რომ ჩვენ 2024 წელს გადავალთ პროპორციულ საარჩევნო სისტემაზე, 2020 წლის ერთი მოწვევის პარლამენტისთვის საარჩევნო ბარიერი 3%-მდე დაიწევს და ა.შ. ასე, რომ უამრავი კომპრომისული ნაბიჯი გადაიდგა ჩვენი გუნდის მიერ იმისათვის, რომ მონახულიყო ნიადაგი პოლიტიკური კონსენსუსისთვის".

კვირიკაშვილი მიიჩნევს, რომ 2010 წლის კონსტიტუციაში დამახინჯებული იყო დემოკრატიის ყველაზე საბაზისო პრინციპები.

პრემიერმინისტრი აცხადებს, რომ მესამე მოსმენამდე ვენეციის კომისიასთან მუშაობასა და პოლიტიკური დიალოგის გაგრძელებას აპირებს.

"არდანახვა იმ უზარმაზარი ნაბიჯებისა, რომლებიც გადადგა ჩვენმა გუნდმა, ნამდვილად არის მხოლოდ და მხოლოდ პოლიტიკური აქტი და არაფერი იმის იქით" - განაცხადა გიორგი კვირიკაშვილმა.