საფარის განცხადებით, 8 ივლისს თბილისში უცხო ქვეყნის მოქალაქე გააუპატიურეს. ორგანიზაცია ვარაუდობს, რომ მოძალადე მხოლოდ ერთი პირი არ ყოფილა.

  • პოლიცია ადგილზე ქალის მეგობარმა გამოიძახა, ამის მიუხედავად კი გამოძიება რამდენიმე დღის დაგვიანებით, მხოლოდ მას შემდეგ დაიწყო, რაც საქმეში საფარი ჩაერთო.
  • ორგანიზაციაში ამბობენ, რომ პოლიციამ კლინიკას, სადაც ქალი გადაიყვანეს, არ შეატყობინა, რომ პაციენტი სავარაუდო ძალადობის მსხვერპლი იყო.
  • "ამიტომ, მეორე დღეს ის ისე გამოწერეს, რომ არ ჩაუტარეს შესაბამისი გამოკვლევები, არ დაუთვალიერეს სხეული ძალადობის კვალის აღმოსაჩენად, არ აუღეს ბიოლოგიური მასალა შესაბამისი ექსპერტიზისთვის და ა.შ."

დეტალები: საფარის ცნობით, საქმეში მათი ჩართვის შემდეგ გამოძიება დაიწყო, თუმცა პოლიციის გულგრილი, არაპროფესიონალური და დისკრიმინაციული დამოკიდებულების გამო მნიშვნელოვანი მტკიცებულებები განადგურდა.

  • "მაგალითად, ქალის ტანსაცმელი ამოიღეს დაგვიანებით; არ გამოკითხულან სავარაუდო მოძალადეები, არ ამოღებულა მათი ტანსაცმელი და ჭურჭელი, საიდანაც ქალს, სავარაუდოდ, მოწამლული სასმელი დაალევინეს; პოლიციამ არ შემოსაზღვრა შემთხვევის ადგილი და ყველა მტკიცებულება, რაც ადგილზე შეიძლება ყოფილიყო, გადაითელა".
  • გარდა ამისა, საფარის ინფორმაციით, ქალი ჰყვება, რომ პოლიციელებს მის მიმართ ცინიკური და დისკრიმინაციული დამოკიდებულება ჰქონდათ.
  • "ამ მხრივ, განსაკუთრებით გამოირჩეოდა ვაკე-საბურთალოს მე-4 განყოფილების ხელმძღვანელის მოადგილე. ის ქალის ტელეფონში ათვალიერებდა მის ფოტოალბომს, რითაც, თითქოს, ქალის ცხოვრების წესის შესახებ ინფორმაციის მიღებას ცდილობდა. ასევე, ქალს არწმუნებდა, რომ თუ ვერ დაამტკიცებდა გაუპატიურების ფაქტს, შესაძლოა, თავად ის დაეკავებინათ".
  • საფარი, როგორც ქალის ინტერესების დამცველი, ითხოვს საქმე გამოსაძიებლად თბილისის საგამოძიებო სამმართველოს გადაეცეს, დაიკითხოს ყველა მოწმე, ამოიღონ ყველა მტკიცებულება და ჩატარდეს ყველა სხვა საგამოძიებო მოქმედება.
  • ასევე, ორგანიზაციის თქმით, უკვე შეიტანეს საჩივრი საქმეში ჩართული პოლიციელების მიერ ჩადენილი სამოხელეო დანაშაულის ფაქტზე და ითხოვენ მათ სისხლისსამართლებრივ პასუხისგებაში მიცემას.
  • On.ge კომენტარისთვის შინაგან საქმეთა სამინისტროსთან ცდილობს დაკავშირებას. პასუხს მიღებისთანავე შემოგთავაზებთ.