ცოტა ხნის წინ, ორმა გიგანტმა კინოკომპანიამ Columbia Pictures და Sony Pictures-მა თავიანთი ერთობლივად პროექტის, Jumanji: Welcome to the Jungle-ის, ტრეილერი წარუდგინეს მაყურებელს.

როგორც ტრეილერიდან ვიგებთ, სკოლის მოსწავლეები, რომლებსაც დირექტორი ოთახის დალაგებას დაავალებს, ძველ ვიდეო თამაშს აღმოაჩენენ. მისი ჩართვის დროს ისინი იმ პერსონაჟებს ირჩევენ, რომლებიც სურთ ამ თამაშში იყვნენ.

თამაშის დაწყების დროს სკოლის მოსწავლეები ტელევიზორის ეკრანის გავლით ჯუნგლებში აღმოჩნდებიან და მიხვდებიან, რომ ისინი იმ პერსონაჟებად იქცნენ, რომლებიც აირჩიეს.

მაგალითად, გამხდარი სპენსერი დაკუნთული სმოლდერად გადაიქცევა, მორცხვი მარტა სექსუალური რუბი ხდება, ბეთანის კი, რომელმაც თამაშის წინ კაცი პერსონაჟი აირჩია, მოუწევს თამაშის დასრულებამდე პროფესორი შელი ობერონი იყოს.

თამაშის წესების მიხედვით მათ უამრავი დაბრკოლებისა და თავგადასავლის გადალახვა მოუწევთ, მათ შორის ერთ-ერთი მთავარი მისია 20 წლის წინ ჯუმანჯის თამაშის დროს გაუჩინარებული ალან პარიშის პოვნაა. იმ შემთხვევაში თუ გუნდი დაბრკოლებებს ვერ გადალახავს ისინი ჯუნგლებში სამუდამოდ დარჩებიან და უკან ვერასდროს დაბრუნდებიან.

როგორც კინოკომპანიის წარმომადგენლები ამბობენ, ახალი ფილმი მისი წინამორბედისგან განსხვავებით გაცილებით მაღალი დონის იქნება და ისიც კლასიკურ საოჯახო ფილმად იქცევა. თუმცა გაითვალისწინეს, რომ დიდი გამოწვევის წინაშე იდგნენ და ამიტომ ფილმის რიმეიქის ნაცვლად სიქუელის გადაღება გადაწყვიტეს.

ფილმში მთავარ როლებს - დუეინ ჯონსონი, კარენ ჯილიენი, კევინ ჰარტი, ნიკ ჯონასი და ჯეკ ბლეკი შეასრულებენ.

ახალი ჯუმანჯის პრემიერა 2017 წლის 20 დეკემბერს არის დაგეგმილი.