რა მოხდა: ალტინფოს დაორგანიზებული ჰომოფობიური, ძალადობრივი და პრორუსული ჯგუფები სასულიერო პირებთან ერთად დღეს ვაჟა ფშაველას ძეგლთან შეიკრიბნენ და მსვლელობით თბილისი პრაიდის საფესტივალო ტერიტორიაზე ავიდნენ.

• ისინი დაუფარავად აჟღერებდნენ დანაშაულებრივ მოწოდებებს და ამბობდნენ, რომ დახურულ ტერიტორიაზე დაგეგმილი ღონისძიების ჩაშლას აპირებდნენ.
• გზაშიც და საფესტივალო ტერიტორიასთანაც მობილიზებული იყო პოლიცია, თუმცა ძალადობრივი ჯგუფები ლისის ტბამდე დაუბრკოლებლად ავიდნენ.
• ამის შემდეგ მათ არაერთხელ გაარღვიეს პოლიციის კორდონი — მედიების კადრებში ჩანდა, რომ რამდენიმე მათგანი ტერიტორიიდან გაარიდეს, ამ დრომდე უცნობია დააკავეს თუ არა ვინმე.
• ადგილზე სპეცრაზმიც გამოჩნდა, თუმცა ამის მიუხედავად მოძალადეები წინ მიიწევდნენ და საბოლოოდ, საფესტივალო ტერიტორიამდე მივიდნენ.

თბილისი პრაიდის გუნდს ტერიტორიის დატოვება მოუწია. მათი განცხადებით, სამართალდამცავებმა ვერ შეძლეს ტერიტორიის დაცვა და სამარშრუტო ტაქსებით ევაკუაცია განხორციელდა.

• ორგანიზატორებმა მოუწოდეს ფესტივალის სტუმრებს, აღარ ავიდნენ ტერიტორიაზე, რადგან იქ ყოფნა უსაფრთხო არ არის.
• ამის შემდეგ მოძალადეები ტერიტორიაზე შეიჭრნენ, დაარბიეს და დაწვეს დროშები და სტენდები.
• მოგვიანებით პრაიდის ორგანიზატორებმა განაცხადეს, რომ დღეს განვითარებული მოვლენები მიანიშნებს, რომ თავდასხმა წინასწარ კოორდინირებული და შეთანხმებული შინაგან საქმეთა სამინისტროსა და ძალადობრივ დაჯგუფება ალტ-ინფოს შორის.

შს მინისტრის მოადგილემ, ალექსანდრე დარახველიძემ თავის მართლება სცადა და უსაფრთხოების ვერდაცვა გაშლილ სივრცეს და ხალხის რაოდენობას დააბრალა.

• მისი მტკიცებით, დიდიდან მობილიზებული იყო ყველა საჭირო დანაყოფი, ვისაც ჰქონდა შესაბამისი უფლებამოსილება.
• ჟურნალისტების კითხვას, რატომ არ გადაკეტეს გზები და არ მიიღეს შესაბამისი პრევენციული ზომები, მან არ უპასუხა.
• კითხვაზე, მარტის აქციაზე რომ წყლის ჭავლი და წიწაკის სპრეი გამოიყენეს, რატომ არ ჩათვალეს საჭიროდ ახლა, როცა წინასწარ იცოდნენ რა მზადდებოდა, მან ასე უპასუხა:
• "დღეს მობილიზებული იყო მაქსიმალური რაოდენობა პოლიციის ამ ლოკაციაზე, რაც შეიძლება ყოფილიყო დაცვისთვის. თუმცა მოგეხსენებათ, რომ შეუძლებელია 100%-იანი უსაფრთხოება იყოს უზრუნველყოფილი ყველა აქციაზე. განსაკუთრებით ისეთ პერიოდში, როცა საუბარია გაშლილ ტერიტორიაზე. ჩვენ ამ რისკების თაობაზე მუდმივად ვსაუბრობდით, მაგრამ ხედავთ, რომ მოვიდა ძალიან დიდი რაოდენობა კონტრაქციის მონაწილეებისა. ჩვენ ყველაფერი გავაკეთეთ იმისათვის, რომ თითოეული ადამიანის სიცოცხლე და ჯანმრთელობა ყოფილიყო დაცული".
• დარახველიძემ არ უპასუხა არც იმ კითხვას, რატომ არ გამოიყენეს წყლის ჭავლის მანქანა, რომელიც ტერიტორიაზე ჰყავდათ აყვანილი.

შალვა პაპუაშვილის აზრით, პოლიციას შესაბამისი რეაგირება ჰქონდა და სათანადოდ უზრუნველყო უსაფრთხოება.

• "რამდენადაც ვიცი, უბრალოდ ღონისძიებიდან ვერ ვადევნებდი ყურადღებას, არავინ დაზარალებულა. ამიტომ მნიშვნელოვანია, რომ პოლიციამ ეს ამოცანა შეასრულა. რაც შეეხება, თავად ღონისძიების ჩაშლას და იმ ადამიანებს, რომლებიც მათ შორის პოლიციას უწევდნენ წინააღმდეგობას, რა თქმა უნდა, კიდევ ერთხელ, ნებისმიერი ძალადობა არის დასაგმობი", — ამბობს პარლამენტის თავმჯდომარე.
• თუმცა, პრაიდის ფესტივალის ჩაშლის შემდეგ მისმა თანაგუნდელმა, პარტიის პოლიტსაბჭოს წევრმა და დეპუტატმა დიმიტრი სამხარაძემ მოძალადეებს მხარდაჭერა გამოუცხადა და ჰომოფობიურ პოსტში კმაყოფილება გამოხატა.
• "პოლიციას შესაბამისი რეაგირება ჰქონდა. არ ვიცი მე, არის თუ არა ვინმე დაკავებული, მაგრამ ყოველ შემთხვევაში, ინფორმაცია, რაც აქამდე მაქვს არის ის, რომ პოლიციამ სათანადოდ უზრუნველყო უსაფრთხოება — როგორც მონაწილეების, ასევე, როგორც ვიცი, ჟურნალისტების მიმართაც თუ იყო გამოხატული აგრესია, პოლიცია ყველგან ჩაერია და უზრუნველყო ყველა ჟურნალისტის უსაფრთხოება", — თქვა პაპუაშვილმა.