რატომ არის მნიშვნელოვანი: თბილისში პრაიდის კვირეული იმართება, რომლის დასკვნითი ღონისძიებაც 8 ივლისსაა დაგეგმილი.

  • კვირეულის ორგანიზატორები, წარსული გამოცდილების გათვალისწინებით, წერენ, რომ ფესტივალის დღეს, შესაძლოა, დაძაბული ან სახიფათო სიტუაციები შეიქმნას.
  • სწორედ ამიტომ ლგბტქ+ უფლებადამცველი ორგანიზაცია, თბილისი პრაიდი, ექსპერტებთან კონსულტაციების საფუძველზე, მოქალაქეებს უსაფრთხოების რეკომენდაციებს უზიარებს.

დეტალები: თბილისი პრაიდი მოქალაქეებს ურჩევს, ფესტივალის დღეს მოერიდონ ვაჟა-ფშაველას მეტროს მიმდებარე ტერიტორიას, რომელიც ძალადობრივი ჯგუფების მიერ ორგანიზებული შეკრების გამო მაღალი რისკის ზონადაა მონიშნული.

  • ასევე, ორგანიზაციის რეკომენდაციაა, შეძლებისდაგვარად მოერიდოთ მარტო გადაადგილებას და იმგზავროთ ჯგუფურად.
  • "თუ არ იცნობთ ადამიანებს, ვინც თქვენთან ერთად დაესწრებიან ფესტივალს, გთხოვთ დაგვიკავშირდეთ. შესაძლებელია ამ ნაწილში ფესტივალის სტუმრებს მიეცეთ დამატებითი რეკომენდაციები", — ვკითხულობთ განცხადებაში.
  • იმის გამო, რომ ძალადობრივი ჯგუფები ხშირად ინდივიდებს გარეგნობის ან თვალსაჩინო მახასიათებლების გამო ესხმიან თავს, თბილისი პრაიდის გუნდი ფიქრობს, რომ, "შესაძლოა, გონივრული იყოს ამ პოტენციური რისკის გათვალისწინება საჯარო სივრცეებში გადაადგილებისას".
  • ასევე, გირჩევენ, დატენოთ მობილური მოწყობილობები და დარწმუნდეთ, რომ გაქვთ საშუალება, დაუკავშირდეთ სხვებს.
  • ხოლო, თუკი ღონისძიებების მიღმა რაიმე საეჭვოს შეამჩნევთ, თავს დაუცველად ან არაკომფორტულად იგრძნობთ, დაუყოვნებლივ შეატყობინეთ პრაიდის გუნდს, ღონისძიების პერსონალს ან/და დაცვას.