აშშ-ს პოლიციის თქმით, ტეხასის შტატში 8 წლის წინ დაკარგული თინეიჯერი, რუდოლფ (რუდი) ფერიასი ეკლესიის ეზოში მძინარე იპოვეს.

ფერიასს 2015 წლის 6 მარტიდან ეძებდნენ, მას შემდეგ, რაც 17 წლის ბიჭი ჰიუსტონში ძაღლების გასეირნებისას გაუჩინარდა. 2018 წელს პოლიციამ შეტყობინება მიიღო, რომ რუდოლფი ერთ-ერთი ოჯახის წევრის სახლის უკანა ეზოში მძინარე შენიშნეს, თუმცა ბიჭის პოვნა მაშინაც ვერ მოხერხდა.

პოლიციის თქმით, 29 ივნისს მათთან ზარი შევიდა, რომელიც ჰიუსტონის ეკლესიის ეზოში მძინარე ადამიანისთვის დახმარებას ითხოვდა. ადგილზე მისულებმა აღმოაჩინეს, რომ ფერიასს თან ნივთი ჰქონდა, რომლითაც მისი ოჯახის წევრის იდენტიფიცირება შეძლეს და დაუკავშირდნენ, რის შემდეგაც ეკლესიასთან რუდოლფის დედა მივიდა.

ფერიასი სასწრაფოს ექიმებმაც გასინჯეს, თუმცა მან საავადმყოფოში გადაყვანაზე უარი თქვა. რუდოლფს ლაპარაკი არ შეუძლია, ამიტომ ჯერჯერობით გაურკვეველია, სად იყო მთელი ამ წლების განმავლობაში ან ეკლესიის ეზოში როგორ აღმოჩნდა, თუმცა, პოლიციის თქმით, ის ახლა ოჯახთან უსაფრთხოდაა, საქმეზე კი გამოძიება გრძელდება.

დეტალები იმის შესახებ, თუ რა მდგომარეობაში იპოვეს ის, უცნობია, თუმცა ოჯახის განცხადებაში ვკითხულობთ, რომ კაცი ამჟამად ტრავმის სამართავად საჭირო დახმარებას იღებს. პოლიციის თქმით, მათთვის ახლა ყველაზე მნიშვნელოვანი რუდოლფისა და მისი ოჯახის ჯანმრთელობასა და უსაფრთხოებაზე ზრუნვაა.

"ჩვენი მისიაა, გავაგრძელოთ ოჯახების მხარდაჭერა, რომელთა ახლობლებიც დაიკარგნენ", — აღნიშნა ტეხასის დაკარგულთა ცენტრის თანამშრომელმა, მელისა რენგელმა.

დაკარგული და ექსპლუატირებული ბავშვების ეროვნული ცენტრის თქმით, 2022 წელს FBI-ში დაკარგული ბავშვების შესახებ 360 000-მდე შეტყობინება შევიდა. პოლიცია საქმეს კვლავ იძიებს და ბიჭის გამოკითხვას გეგმავს.