რატომ არის მნიშვნელოვანი: დიმიტრი სამხარაძე ქართული ოცნების პოლიტსაბჭოს წევრი და უკვე მეორე მოწვევის დეპუტატია, თუმცა საზოგადოება საკანონმდებლო მოღვაწეობით ნაკლებად იცნობს, რადგან მდუმარე დეპუტატებს მიეკუთვნება.

  • ამის საპირწონედ, ის ცნობილია არაეთიკური და შეურაცხმყოფელი გამონათქვამებით, ოპოზიციისა და აქტივისტების გინებით, მედიის დისკრედიტაციის მცდელობებით და რუსული კანონის მხარდაჭერით.
  • საკუთარ ფეისბუქგვერდზე ხშირად აჟღერებს ჰომოფობიურ, სექსისტურ განცხადებებსაც.
  • ის გამოესარჩლა ბერასაც მაშინ, როცა ფარული ჩანაწერები გავრცელდა და მომღერალმა მათი შინაარსი ნაწილობრივ დაადასტურა. მაშინ დეპუტატმა დაწერა: "ბერა, ნამდვილები ერთად ვართ".
  • სამხარაძე არავის "პატიობს" ქართული ოცნების კრიტიკას, მათ შორის, არც ყოფილ თანაგუნდელებს.
  • მაგალითად, გახარიას პრემიერობისას ამბობდა, რომ საქართველოს გაუმართლა მისნაირ პრემიერმინისტრში, შემდეგ კი მას ცრუპენტელას უწოდა.

ამჯერად სამხარაძე ხელისუფლების კრიტიკოსებზე გახშირებულ თავდასხმებს გამოეხმაურა და დაწერა, რომ ძალადობას არათუ გმობს, არამედ აპირებს, წაახალისოს.

  • "ყველას მოვუწოდებ, ჩვენი სამშობლოს მტრებს საკადრისი პასუხი გასცენ! ჩემი ოჯახის ამწიოკებელზე, ჩემი გუნდის წევრის გამლანძღველზე და შემგინებელზე ძალადობას არ დავგმობ! არც აქამდე არ დამიგმია და არც არასდროს არ ვაპირებ! ვინც მარჯვენა ლოყაში მომარტყავს, მოვაჭამ თავს".
  • ლანძღვა-გინებით გამორჩეული დეპუტატი ირწმუნება, რომ "ოცნების" წევრები არავის აყენებენ შეურაცხყოფას.
  • "მსგავსი ქმედების ერთი ფაქტიც კი არ არსებობს! მხოლოდ მაშინ ვრეაგირებთ და ათასჯერ მძლავრად და ხარისხიანად ვუბრუნებთ პასუხს, როცა ჩვენ გვიკეთებენ რაიმე ცუდს!"
  • "ასე რომ, შმაცებო ვერაფრით ვერ ავიკიდებ "დაგმე ძალადობის" კომპლექსს", — წერს სამხარაძე.