რატომ არის მნიშვნელოვანი: მიუხედავად კალაძის მტკიცებისა, მმართველი გუნდის განცხადებებში არაერთხელ მოგვისმენია, რომ ძალადობას არ ამართლებენ, მაგრამ...

  • უფრო მეტიც, ისინი არათუ ამართლებენ ხოლმე, არამედ ახალისებენ კიდეც მას.
  • მაგალითად, სწორედ ასე დაიწყო 5 ივლისის ძალადობა, რომელსაც წინ ღარიბაშვილის განცხადება უძღოდა იმაზე, რომ ღირსების მარშს მიზანშეწონილად არ მიიჩნევს.
  • 5 ივლისს, როცა უკვე დაწყებული იყო ძალადობა, ღარიბაშვილმა ისევ თბილისი პრაიდი გააკრიტიკა.
  • "ჩვენ კარგად უნდა გვესმოდეს ყველას რომ ეს საქართველოა, ჩვენ გვაქვს ჩვენი ტრადიციები, ჩვენი წესები და ყველამ უნდა სცეს პატივი ჩვენ წესებსა და ტრადიციებს", — ამბობდა ის.

კიდევ რამდენიმე ფაქტი: ძალადობა გაამართლეს მაშინაც, როცა იურიდიულ საკითხთა კომიტეტის თავმჯდომარე, ანრი ოხანაშვილი ასეულობით ადამიანის გარემოცვაში კრიტიკული მედიის, TV პირველის მფლობელს დაესხა თავს.

  • ასე მოხდა ახლო წარსულშიც — ძალადობის გამართლებისგან თავი კობახიძეს არც მაშინ შეუკავებია, როცა ოპოზიციური პარტიის ლიდერზე, ზურაბ ჯაფარიძეზე თავდასხმაზე და თსუ-ში მომხდარ ინციდენტზე ჰკითხეს.
  • ამასაც წინ ტრადიციული ფრაზა — ძალადობა არის მიუღებელი, მაგრამ... — უძღოდა.
  • ქართული ოცნების თავმჯდომარე ძალადობის ცალსახად დაგმობის ნაცვლად იმაზე აპელირებდა, თითქოს კონკრეტული ძალები ქვეყანაში პოლარიზაციასა და რადიკალიზაციას ცდილობენ.
  • მეტიც, ძალადობის წახალისებაში თავად დაზარალებულები დაადანაშაულა.
  • დღეს კი ლევან ბერძენიშვილზე განხორციელებული თავდასხმის გამართლების მცდელობა და პროპაგანდისტული ნარატივი ვიხილეთ, რომელსაც პროფესორის დისკრედიტაციისთვის ხშირად იყენებენ.
  • კობახიძე აპელირებდა ეროვნული იდენტობის, ეკლესიისა და პატრიარქის თემებით და თქვა, რომ ბერძენიშვილი პირდაპირაა ჩართული მიუღებელ აგიტაციაში, ებრძვის გმირ მეფეებს.
  • სულ რამდენიმე დღის წინ კი კალაძემ კიდევ ერთხელ წაახალისა ქვეყანაში ჰომოფობია და მაკდონალდის წინააღმდეგ აგორებულ დისკრედიტაციულ კამპანიას შეუერთდა.

ამ ყველაფრის შემდეგ კალაძე ვერ იხსენებს, რომელი ფაქტი წაახალისა მისმა პარტიამ.

  • ამბობს, რომ ძალადობა კატეგორიულად მიუღებელია, რადგან დემოკრატიულ ქვეყანას ვაშენებთ.
  • "არ უნდა ხდებოდეს ძალადობის წახალისება. როდესაც პოლიციელს მოლოტოვის კოქტეილს ესვრიან, აქვთ მცდელობა, ცოცხლად დაწვან პოლიციელები, ოპოზიციური სპექტრის წარმომადგენლები კი გამოდიან და სურთ გმირად შერაცხონ ასეთი ადამიანი, ეს დამაზიანებელია".