თმენის ვალდებულება რომ გვერდით გადავდოთ, მმართველი გუნდის დეპუტატებს საზოგადოების წინაშე დამატებითი პასუხისმგებლობა აკისრიათ. გუშინდელი საღამოს შემდეგ კი ვხედავთ, რომ ამ პასუხისმგებლობის აღებას და გააზრებას არავინ აპირებს. მეტიც, თავის მართლებას ისე ცდილობენ, რომ დამნაშავე არა მოძალადე, არამედ მსხვერპლი გამოჩნდეს.

რატომ არის მნიშვნელოვანი: ანრი ოხანაშვილი იურიდიულ საკითხთა კომიტეტის თავმჯდომარეა და გუშინ ასეულობით ადამიანის გარემოცვაში კრიტიკული მედიის, TV პირველის მფლობელს თავს დაესხა.

• შემთხვევა აშშ-ის საელჩოს ტერიტორიაზე, დამოუკიდებლობის დღისადმი მიძღვნილ ღონისძიებაზე მოხდა, სადაც, დიპლომატიური კორპუსის, მედიის, არასამთავრობო ორგანიზაციების წარმომადგენლები იყვნენ შეკრებილი.
• უფლებადამცველები და მედიები ხშირად ვამბობთ, რომ ხელისუფლების რიტორიკა ძალადობას ახალისებს, მაგრამ როცა დეპუტატი თავად არის მოძალადე და თან ცდილობს, დაუსჯელი დარჩეს, ეს საგანგაშო სიგნალია სხვა ჯგუფებისთვის.

რას ამბობს ოხანაშვილი: საკუთარი ქმედებების გამართლებას, ისეთ საკითხებზე აპელირებით ცდილობს, როგორიცაა "ქართველობა" და "კაცობა". ამბობს, რომ მისი ქმედება "პროპორციული" იყო, "ზღვარგადასული არაფერი გაუკეთებია" და წერეთელმა "მიიღო პასუხი, რომელსაც იმსახურებდა".

• ეს, ერთი მხრივ, ქუჩური მენტალიტეტის გამოვლინებაა, სწორედ ისინი ცდილობენ დაამტკიცონ, რომ მსგავს შემთხვევებში აგრესია მისაღებია.
• მეორე მხრივ, კი დეპუტატი ამტკიცებს, თითქოს "ყურთან ჩურჩულით უკადრებელი უთხრეს" და "პროვოკაციაზე წამოაგეს" — რომც დავუშვათ, რომ ეს სიმართლეა, თმენის ვალდებულების კომპონენტი არსად ქრება.
• მეტიც, კანონმდებელი ამტკიცებს, რომ ეს იყო თავდასხმა მასზე და "პროვოკაციაზე" უმკაცრეს რეაგირებას ითხოვს.
• აქვე ის მოითხოვს, წერეთელი ნარკოტიკულ ან ალკოჰოლურ თრობაზე შეამოწმონ.

ზარქუა და მგალობლიშვილიც, რომლებიც ვატო წერეთელმა ინციდენტის მონაწილეებად დაასახელა, იმავეს იმეორებენ — მათი აზრით, ცუდია, რაც მოხდა, მაგრამ... ისინიც ცდილობენ დაამტკიცონ, თითქოს, როცა საქმე "კაცის ღირსებას" ეხება, მსგავსი საქციელი მისაღებია.

• ზარქუა: "ცუდია რაც მოხდა და მიუღებელია, მაგრამ როდესაც შეურაცხყოფას მიაყენებ სხვას, იმისთვისაც მზად უნდა იყო რომ პასუხს მიიღებ იმ კაცისგან!"
• მგალობლიშვილი: "ყველაფერი გააკეთა, რომ მომხდარიყო პროვოკაცია, მივიდა ბატონ ანრისთან და მას ყურში ჩასჩურჩულა ისეთი უმსგავსო და უკადრისი სიტყვები, რასაც ქართველი კაცი ალბათ, კი არა, ვერ აიტანს ვერასოდეს" .

განმეორებადი მესიჯბოქსი: ქართული ოცნების სხვა დეპუტატებმა, როგორც სჩვევიათ, თანაგუნდელის დაცვა დაიწყეს.

• ადამიანის უფლებათა კომიტეტის თავმჯდომარე, მიხეილ სარჯველაძე ძალადობის გამართლებას "ადამიანური ფაქტორით" ცდილობს და ამბობს, რომ თუ პროვოკაციაა, ბუნებრივია, "შეიძლება ცუდი რეაქცია მოჰყვეს".
• ელისო ბოლქვაძემ ოხანაშვილს "უპირობო მხარდაჭერა" გამოუთქვა და რატომღაც დარწმუნებულია, რომ "ასეთი გაწონასწორებული ადამიანის წყობიდან გამოყვანა, მხოლოდ უბინძურესი პროვოკაციითაა შესაძლებელი".
• ახალი არგუმენტი შემოიტანა გია ვოლსკიმ და სხვა ზემოთჩამოთვლილ ფრაზებს ოხანაშვილის "მეოჯახეობაც" დაამატა: "რას შეეძლო გაწონასწორებული, მეოჯახე, კანონმორჩილი ადამიანი გამოეყვანა წყობიდან, გასაგებია".
• მდინარაძემ განგვიმარტა, თითქოს მომხდარის მხოლოდ 2 ვერსია გვაქვს და ის, რომელშიც დეპუტატი მოძალადეა, რთული დასაჯერებელია — იქვე ვატო წერეთელს "ნაცობა" დააბრალა და თქვა, რომ "არ არსებობს მათზე პროვოკატორი" ხალხი.

ძალადობა დაგმო ქარტიამ და ქართული ოცნების დეპუტატებს პოლიტიკური პასუხისმგებლობის აღებისკენ მოუწოდა.

• "ყველა დავმუნჯდით", — ასე გამოეხმაურა მომხდარს ენმ-ის წევრი, ხატია დეკანოიძე.
• ლელოს წევრის, დავით უსუფაშვილის გაცხადებით, როგორც კი ხელისუფალი კუნთებზე ყურებას იწყებს, იქ იწყება მისი დასასრულიც.
• ამავე პარტიის კიდევ ერთ წევრი, სალომე სამადაშვილი კი ამბობს, რომ "ოცნების" პრემიერმა ის დაადანაშაულა ღალატში და ამაზე უარესი ვერაფერი იქნება. იქვე დეპუტატი კითხულობს: "მე უნდა მივსულიყავი და მეთხლიშა პრემიერმინისტრისთვის?"

სტრიქონებს შორის: გუშინ ქართული ოცნების მხარდამჭერებისგან ძალადობის არაერთი ფაქტი დაფიქსირდა. პარტაქტივი სწორედ სახელისუფლებო მესიჯბოქსებით და არგუმენტებით უპირისპირებოდა აქტივისტებსა და ოპოზიციას.

• ფიზიკურად გაუსწორდნენ კამპანია #შინევროპისკენ მონაწილე სტუდენტებს.
• ძალადობის მცდელობა იყო დედაენის პარკშიც, სადაც აქტივისტებს საინფორმაციო შეხვედრა ჰქონდათ.
• მოძრაობის წევრებს ფიზიკურად და სიტყვიერად უპირისპირდებოდნენ რეგიონებშიც.