დეტალები: თბილისის სახელმწიფო უნივერსიტეტში 20-მდე ადამიანი ერთმანეთს ფიზიკურად დაუპირისპირდა.

  • სოციალურ ქსელში გავრცელებულ კადრებში ჩანს, რომ დაპირისპირების მონაწილეთა ერთი ნაწილი მეორეს სცემს, ერთ-ერთ პირს კი კიბეზე აგორებენ.
  • სტუდენტები ამბობენ, რომ ირაკლი კობახიძის ლექციის პარალელურად, საპროტესტო ბანერების გაშლა სურდათ, რა დროსაც აუდიტორიიდან 20-მდე ადამიანი გამოვიდა და მათ ჩხუბი დაუწყო.
  • "მანამდე მოძველბიჭო ელემენტები იდგნენ იქ და საქმეებს არჩევდნენ. მერე გამოვიდნენ აუდიტორიიდან, აღარ მოერიდნენ არაფერს, პლაკატები წაგვართვეს და დაგვიწყეს რტყმა. კიბეებიდან დაგვაგორეს. მერე მოდის დაცვა უკვე, რომ გვცემეს და მერე გამოგვათრიეს იქიდან", — ჰყვება ერთ-ერთი სტუდენტი მედიასთან.
  • მისივე თქმით, მოძალადეები სტუდენტები არ ყოფილან და ისინი კობახიძის მიყვანილი ხალხი იყო.

რატომ არის მნიშვნელოვანი: სტუდენტები აქტიურად აპროტესტებდნენ რუსულ კანონს, რომლის მხარდამჭერები, მათ შორის, მათი ლექტორებიც იყვნენ.

  • მას შემდეგ, რაც ქართულ ოცნებას კანონის ჩაგდება მოუწია, პროტესტმა აკადემიურ სივრცეში გადაინაცვლა და რუსული კანონის მხარდამჭერი ლექტორებისადმი ბოიკოტით გაგრძელდა.
  • ეს პირველი შემთხვევა არ არის, როცა ირაკლი კობახიძეს სტუდენტები პროტესტით დახვდნენ.
  • 10 ივნისს ქართული ოცნების თავმჯდომარეს თბილისის სახელმწიფო უნივერსიტეტში სტუდენტებმა რუსული რუბლები გადააყარეს.
  • მოგვიანებით კობახიძემ ეს ახალგაზრდები ჰომოფობიურად მოიხსენია, მათ "ორიენტაცია არეულები" უწოდა და ბიჭებს ცოლის მოყვანა, გოგოებს კი დაქორწინება ურჩია.