როგორც პროფესორი On.ge-ს უყვება, შემთხვევა ვაკეში იმ დროს მოხდა, როცა უნივერსიტეტიდან გამოდიოდა და ავტომობილისკენ გადაადგილდებოდა.

დეტალები: "მოქალაქემ თქვა, რომ ის არის უკმაყოფილო ჩემით, რომ მე ვარ მოღალატე, რომ მე ერეკლე არ მიყვარს და ამიტომ დავიმსახურე მისგან დედის გინება", — ამბობს ბერძენიშვილი.

  • მისი თქმით, ეს თავდასხმა იმ დისკრედიტაციის ნაწილია, რომელიც ხელისუფლების მხრიდან მიმდინარეობს.
  • "მოქალაქე ზუსტად ისე გამოიყურებოდა, როგორც უნდა გამოიყურებოდეს ასეთი საცოდავი, დაქირავებული არარაობა. დედის გინების გარდა, ვერცერთი სიტყვა გამართულად ვერ თქვა. დედას კარგად იგინებოდა, დაახლოებით, ირაკლი ღარიბაშვილის დონეზე", — გვიყვება ბერძენიშვილი.
  • მისივე თქმით, თავდამსხმელმა კვერცხებიც ესროლა.
  • "მაგრამ ვერ მომარტყა, რადგან კვერცხის მორტყმა ცალკე ოსტატობაა და მაგაზე ხელისუფლებამ უნდა ივარჯიშოს. ჯერჯერობით ვერ არიან კარგები მაგ საქმეში".
  • ბერძენიშვილი არ აპირებს, სამართალდამცველებს მიმართოს.
  • "არ ვენდობი ქართველ სამართალდამცველებს. ჩემს სახლთან რომ მობრძანდნენ და ორასი სული რომ იყო, იმას რა რეაგირებაც მოჰყვა, მახსოვს კარგად და იმის მერე აღარ ვიმართავ, რა აზრი აქვს", — ამბობს ის.

შსს: On.ge სამართალდამცავი უწყებისგან პასუხს ამ დრომდე ელოდება.

რატომ არის მნიშვნელოვანი: რამდენიმე თვეა, ლევან ბერძენიშვილის წინააღმდეგ დისკრედიტაციის კამპანია მიმდინარეობს, რომელშიც ხელისუფლება, სამთავრობო არხები და დაქირავებული აქტივისტები მონაწილეობენ.

  • იყო რამდენიმე შემთხვევა, როცა მას სიტყვიერი შეურაცხყოფა მიაყენეს, ბერძენიშვილს აკრიტიკებდნენ მმართველი გუნდის წევრებიც.
  • 15 იანვარს, ყვარლის ევრო-ატლანტიკურ ცენტრში პროფესორს პიკეტით დახვდნენ და ლექციის ჩატარების საშუალება არ მისცეს.
  • 15 მაისს კი მის სახლთან 20-მდე ნიღბიანი პირი იმყოფებოდა.