რა მოხდა: 6 ივნისს თბილისის, აჭარის, იმერეთის, რაჭა-ლეჩხუმისა და ქვემო სვანეთის პოლიციის დეპარტამენტებში შშმ პირების მიმართ შესაძლო სექსუალური ძალადობისა და მუქარის საქმეებზე გამოძიება დაიწყო.

  • არასრულწლოვნების სექსუალური შევიწროების შემთხვევებზე შშმ ქალთა ორგანიზაციამ ისაუბრა.

  • ორგანიზაციის ხელმძღვანელის, დეა ერემაშვილის ინფორმაციით, მსგავსი ფაქტები, სავარაუდოდ, სამი წელია ხდება, არასრულწლოვნების ასაკი კი 8 წლიდან იწყება.

დეტალები: სამართალდამცავი უწყების განცხადებით, თბილისისა და აჭარის პოლიციის დეპარტამენტებში გამოძიება მიმდინარეობს სსკ-ის 137-ე მუხლით, რაც გაუპატიურებას გულისხმობს.

  • იმერეთის რაჭა-ლეჩხუმისა და ქვემო სვანეთის პოლიციის დეპარტამენტში კი მუქარის საქმეს იძიებდნენ, რომლის ფარგლებშიც ერთი პირი დააკავეს.
  • გამოძიების ვერსიით, დაკავებული შშმ პირების მიმართ შესაძლო სექსუალურ ძალადობაზე ინფორმაციის გავრცელების გამო დაზარალებულს სიცოცხლის მოსპობით დაემუქრა.
  • "სისხლის სამართლის საქმეზე გამოძიება გრძელდება გარემოებების ყოველმხრივი შესწავლის მიმართულებით", — აცხადებენ შსს-ში.