საქართველოს ახალგაზრდა იურისტთა ასოციაციაში, სამართლიან არჩევნებსა და საერთაშორისო გამჭვირვალობა - საქართველოში მიიჩნევენ, რომ საარჩევნო კოდექსში ცვლილებების პროექტი მმართველი პარტიების ინტერესებს ემსახურება. ცვლილებების პროექტს არასამთავრობო ორგანიზაციები 26 ივნისს ერთობლივად გავრცელებულ დოკუმენტში არ ეთანხმებიან.

"კანონპროექტის განმარტებით ბარათში საუბარია იმაზე, რომ აღნიშნული ცვლილება მიზნად ისახავს საარჩევნო ადმინისტრაციის, როგორც სტაბილური ინსტიტუციის, საქმიანობის გაუმჯობესებას. თუმცა, რეალურად იგი მეტად პრობლემურია როგორც საარჩევნო ადმინისტრაციის მიმართ სანდოობის შენარჩუნების კუთხით, ისე პოლიტიკურ ძალებს შორის თანასწორი საარჩევნო გარემოს უზრუნველყოფის თვალსაზრისით", - აღნიშნავენ არასამთავრობო ორგანიზაციები.

კანონპროექტის მიხედვით, სააჩრჩევნო ადმინისტრაციაში პარტიების წევრების დანიშვნა ბოლო საპარლამენტო არჩევნებში ხმების რაოდენობაზე იქნება დამოკიდებული, რაც პარტიებს ერთზე მეტი წევრის დანიშვნის საშუალებას მისცემს.

"შემოთავაზებული ცვლილებით მოხდება ამ ინსტიტუციის კიდევ უფრო მეტად პოლიტიზირება, ვინაიდან ახალი წესი გამოიწვევს, სხვა პარტიებთან შედარებით, მმართველი პარტიის დომინირებულ მდგომარეობას საარჩევნო ადმინისტრაციის ყველა დონეზე," - აღნიშნულია განცხადებაში.

მათი მიაჩნიათ, რომ ცესკოს დაკომპლექტების შემოთავაზებული რეგულაცია ვერ უზრუნველყოფს საარჩევნო ადმინისტრაციი მიმართ ნდობას და არჩევნების მართვის პროცესში პოლიტიკურ პლურალიზმს. მათი აზრით, საარჩევნო ადმინისტრაციის დაკომპლექტება არსებითი საკითხია, რადგან მნიშვნელოვნად განსაზღვრავს საარჩევნო პროცესის სამართლიანად წარმართვისადმი საზოგადოების ნდობას და არჩევნების შედეგების ლეგიტიმურობის ხარისხს, ასევე გავლენას ახდენს დემოკრატიული ინსტიტუტების ფორმირებაზე.

არასამთავრობო ორგანიზაციების აზრით, უნდა განხორციელდეს საარჩევნო ადმინისტრაციის ძირეული რეფორმა და საარჩევნო ადმინისტრაციის ზემდგომი ორგანოები (ცესკო, ოლქი) მხოლოდ პროფესიული ნიშნით დაკომპლექტდეს აპოლიტიკური და დამოუკიდებელი წევრებით.

ამ წესის სრულად ამოქმედებამდე კი არასამთავრობო ორგანიზაციებს მიაჩნიათ, რომ:

• საარჩევნო ადმინისტრაციის დაკომპლექტების წესი არჩევნების შედეგებზე უნდა იყოს მიბმული, თუმცა არა მსგავსი გაუმართლებელი ფორმით: ერთ პარტიას საარჩევნო ადმინისტრაციაში მხოლოდ ერთი წევრის დანიშვნის უფლება უნდა ჰქონდეს და არა რამდენიმე წევრის, როგორც ეს შემოთავაზებული ცვლილებით არის წარმოდგენილი;
• უნდა გაგრძელდეს მუშაობა საარჩევნო კომისიის წევრთა შესარჩევი კონკურსის ჩატარების მარეგულირებელი ნორმატიული ბაზის გაუმჯობესებისა და დახვეწის მიზნით, რათა საარჩევნო კომისიების მსურველ პირთა შორის უზრუნველყოფილი იყოს საუკეთესო კანდიდატების გამოვლენა;
• გვაქვს ერთობლივი დეტალური რეკომენდაციები და მზად ვართ ვითანამშრომლოთ პარლამენტთან საარჩევნო ადმინისტრაციის რეალურ და ძირეულ რეფორმაზე.