ინფორმაციას ფინანსთა სამინისტროს საგამოძიებო სამსახური ავრცელებს.

რატომ არის მნიშვნელოვანი: უწყების ცნობით, სოფლის განვითარების სააგენტოსა და კახეთში რეგისტრირებულ ერთ-ერთ კოოპერატივს შორის გაფორმდა თანადაფინანსების ხელშეკრულება, რომლითაც სახელმწიფო აფინანსებდა კოოპერატივის მიერ ყურძნის მიღება-გადამუშავებისთვის საჭირო ინვენტარის შეძენას, რისთვისაც 500 000 ლარი გამოიყო.

  • ბრალდებულმა, კოოპერატივის ხელმძღვანელმა, გამოიყენა კომპანიის სახელი და გააყალბა ინვენტარის შეძენის დამადასტურებელი დოკუმენტაცია, ასევე, კერძო ექსპერტის მეშვეობით მოიპოვა ყალბი დასკვნა, ობიექტზე ინვენტარის თითქოსდა განთავსებაზე.
  • ბრალდებულმა სოფლის განვითარების სააგენტოს ვალდებულებების შესრულების დასადასტურებლად ყალბი დოკუმენტაცია წარუდგინა, რითაც სახელმწიფოს მიერ გაცემულ თანადაფინანსების თანხას დაეუფლა.

დეტალები: საგამოძიებო სამსახურის ცნობით, ამავე საქმეს ჰყავს სხვა ბრალდებულები ყალბი დოკუმენტების დამზადება-გამოყენებისა და გულგრილობის ფაქტებზე.

  • გამოძიება 210-ე, 362-ე, 220(პრიმა) და 182-ე მუხლებით მიმდინარეობს, რაც 7-დან 11 წლამდე პატიმრობას ითვალისწინებს.
  • "ტარდება შესაბამისი ღონისძიებები სახელმწიფოსთვის მიყენებული ზიანის დაფარვის უზრუნველსაყოფად", — აცხადებენ უწყებაში.