რატომ არის მნიშვნელოვანი: დღეს თურქეთში საპარლამენტო და საპრეზიდენტო არჩევნები იმართება.

• ქვეყანა ისტორიული არჩევანის წინაშე დგას: პრეზიდენტობის ორი ძირითადი კანდიდატი განვითარების მკვეთრად განსხვავებულ გზებზე საუბრობს.
• მოსალოდნელია, რომ არჩევნები განსაზღვრავს ქვეყნის როლს ნატოს ალიანსში, მის ურთიერთობას აშშ-თან, ევროკავშირთან და რუსეთთან, მიგრაციის პოლიტიკას, ანკარას როლს უკრაინის ომში და სხვა მნიშვნელოვან უსაფრთხოების ასპექტებს.

ძირითადი კანდიდატები: მოქმედი პრეზიდენტის მთავარი კონკურენტი, ოპოზიციური სპექტრის საერთო კანდიდატი ქემალ ქილიჩდაროღლუა, მეტსახელად "თურქი განდი".

• ის მთავარ ოპოზიციურ რესპუბლიკურ სახალხო პარტიას (CHP) ხელმძღვანელობს და წინასწარი გამოკითხვებით, რეჯეფ თაიფ ერდოღანთან შედარებით მცირე უპირატესობა ჰქონდა.

• მას სურს თურქეთი ევროკავშირში გაწევრიანების პროცესს დაუბრუნოს და აშშ-თან სამხედრო კავშირები აღადგინოს.

• მიუხედავად იმისა, რომ თურქეთი ნატოს თავდაცვითი ალიანსის ნაწილია, ერდოღანის დროს ქვეყანას მჭიდრო კავშირები აქვს ჩინეთთან და რუსეთთან.

• ქილიჩდაროღლუ კი ირწმუნება, რომ მისი გამარჯვების შემთხვევაში თურქეთში საპარლამენტო მმართველობა იქნება, სადაც პარლამენტი და პრემიერმინისტრი უფლება-მოვალეობებს გაინაწილებენ.
• 20-წლიანი მმართველობის შემდეგ ერდოღანი თურქეთს ექვსი მილიონი სამუშაო ადგილის შექმნას და მრავალმხრივ განვითარებას ჰპირდება.

წინასწარი შედეგები: დღეს არჩევნებზე მაღალი აქტივობა დაფიქსირდა, წინასწარი შედეგების გამოქვეყნებამ კი დიდი გაურკვევლობა გამოიწვია.

• კანონის მიხედვით, თუ ვერც ერთი კანდიდატი ვერ მოიპოვებს ხმების 50%-ზე მეტს, მეორე ტური გაიმართება.
• თავდაპირველად, სახელმწიფო საინფორმაციო სააგენტო Anadolu-ს მონაცემების მიხედვით, ერდოღანი ლიდერობდა.
• ამ მონაცემების საფუძველზე მოქმედი პრეზიდენტის მხარდამჭერებმა აღნიშვნა დაიწყეს, თუმცა თურქეთის დედაქალაქის და სტამბულის მერებმა განაცხადეს, რომ ანადოლუს "არ აქვს სანდოობა" და რეალურად ოპოზიციის კანდიდატი ლიდერობდა.
• თავად ქილიჩდაროღლუმ კი ტვიტერზე დაწერა — "ჩვენ წინ ვართ" — ერდოღანმა ეს უპასუხოდ არ დატოვა და შედეგების ნაჩქარევად გამოცხადების მცდელობა "ეროვნული ნების უზურპაციად" შეაფასა.
• კერძო საინფორმაციო სააგენტოს ანქას მონაცემებით, როცა ხმათა 31,3% იყო დათვლილი ქილიჩდაროღლუ 47,4%-ით ლიდერობდა და მეორე ტური იყო მოსალოდნელი.

ბოლო სიახლეები: რამდენიმე წუთის წინ ერდოღანის მაჩვენებლები 50%-ს ჩამოცდა, როგორც ანადოლუ წერდა, ამ დროისთვის ხმების 89,2% იყო დათვლილი.

• გამოცემის ამჟამინდელი მონაცემებით კი, დათვლილია ხმების 93,67% და შედეგები ასე გადანაწილდა: ერდოღანი — 49,63%, ქილიჩდაროღლუ — 44,63%.
• ოპოზიციის კანდიდატი უკვე გამოეხმაურა მოქმედი პრეზიდენტის რეიტინგის დაწევას და განაცხადა, რომ კენჭისყრის დამკვირვებლებმა და საარჩევნო კოლეგიის წარმომადგენლებმა არ უნდა დატოვონ ადგილები, სანამ ხმის დათვლა არ დასრულდება: "ამაღამ არ დავიძინებთ, ჩემო ხალხო".
• როგორც BBC წერს, შესაძლოა, სტამბულის, ანკარისა და იზმირის ხმებმა არჩევნების შედეგი შეცვალოს — იზმირსა და სტამბულში ჯერჯერობით ქილიჩდაროღლუ უსწრებს, ხოლო ანკარაში ერდოღანი ლიდერობს.
• ოფიციალური შედეგი სამ დღეში გახდება ცნობილი.