მუქარის და გინების შემცველი კადრები ტელეგრამ არხების მეშვეობით ვრცელდება.

რატომ არის მნიშვნელოვანი: ვიდეო ჩანაწერში, რომელშიც სავარაუდოდ ვაგნერის დაჯგუფების წევრები მონაწილეობენ, ქართველებს ემუქრებიან, აგინებენ და საქართველოს და ევროკავშირის დროშას შეურაცხყოფენ.

  • გავრცელებული ინფორმაციით, ჩანაწერი ბახმუტშია გაკეთებული, და შენიღბული ვაგნერელები ირწმუნებიან, რომ ფრონტის ხაზზე ქართველი მებრძოლები გაანადგურეს.

დეტალები: უცნობია ჩანაწერის გაკეთების თარიღი.

  • "გაფრთხილება ყველა ნაბი*ვარს — ჩვენ ვნახეთ თბილისის ცენტრში ქართველმა ნაცისტებმა როგორ დაწვეს რუსული დროშა. ჩვენ ასევე ვნახეთ, სხვადასხვა ქართველი ეშმაკები როგორ ბილწავენ რუსების სახლებს საქართველოში", — ამბობს ვაგნერის წევრი.
  • იგი ირწმუნება, რომ ფრონტზე ქართველების პოზიციები გაანადგურა და ხელთ იგდო საქართველოს და ევროკავშირის დროშები, რომელზეც შარდავს და ამ პროცესს ვიდეოში აჩვენებს.
  • "ნახეთ, რას ვუზამთ ახლა იმ ქვეყნების დროშებს, რომლებიც ჩვენს დროშას დასცინიან. თავად ნახეთ და იცოდეთ, შემდეგი თქვენ იქნებით, დედამო**ნული ქართველები", — აცხადებს იგი.

ქართული ოცნების თავმჯდომარე ტელეგრამზე გავრცელებულ კადრებს გამოეხმაურა და დადგმული პროვოკაცია უწოდა".

  • "ასეთ პროვოკაციებზე კომენტარებს შეგნებულად არ გავაკეთებთ. დეტალებში არ შევალ, მაგრამ თქვენ იხილეთ არაერთი დადგმული პროვოკაცია კონკრეტული სუბიექტების მხრიდან. ჯერ მოიხსნან ნიღბები და მერე გავაკეთებთ კომენტარებს", — განაცხადა ირაკლი კობახიძემ.