5 მაისს ილიას სახელმწიფო უნივერსიტეტის მეცნიერებათა და ხელოვნების ფაკულტეტის ორგანიზებითა და მსოფლიოს წამყვანი ისტორიკოსებისა და ილიაუნის პროფესორების მონაწილეობით გაიმართა ვორკშოპი თემაზე კავკასია გლობალურ ისტორიაში.

შეხვედრაზე მიმოიხილეს ისტორიული კვლევების გლობალური ტენდენციები და მათი მიმართება მიმდინარე ქართულ საკვლევ თემებთან გლობალური ისტორიის ჭრილსა და კონტექსტში.

"ილიას სახელმწიფო უნივერსიტეტში გამართული ვორკშოპის თემა განსაკუთრებით აქტუალურია, რადგან დღეს ძალიან მნიშვნელოვანია კავკასიის, კერძოდ საქართველოს, ისტორიის კვლევა თანამედროვე ისტორიოგრაფიული მეთოდოლოგიის გამოყენებით. კვლევების გამრავალფეროვნება ამ მიმართულებით ხელს შეუწყობს საქართველოს შესახებ კვლევათა უფრო მჭიდროდ ინტეგრირებას საერთაშორისო აკადემიურ სივრცეებში", — ამბობს ნინო მატარაძე, ილიაუნის მეცნიერებათა და ხელოვნების ფაკულტეტის დეკანი.

"დღევანდელი ვორკშოპი განიხილავს იმ შესაძლებლობებს, რომლებიც დევს ეროვნულ ისტორიოგრაფიაში, იმისთვის, რომ შეტანილი იყოს გლობალური მიდგომის კვლევებში. ვორკშოპის მონაწილე პროფესორებს ამ სფეროში ხანგრძლივი მუშაობის გამოცდილება აქვთ, დიდი გამოცდილება, და სწორედ მათი კომენტარების გათვალისწინებით გვინდა გავაუმჯობესოთ საქართველოს მეცნიერთა წვლილი კავკასიის ისტორიაში გლობალურ კონტექსტში", — განაცხადა ილიას სახელმწიფო უნივერსიტეტის პროფესორმა, ოლივერ რაისნერმა.

"საქართველოში მეორედ ვმონაწილეობ ვორკშოპში, რომლის თემაა „გლობალური ისტორია და კავკასია გლობალურ ისტორიაში“. ეს ჩემთვის საინტერესო და მნიშვნელოვანი საკითხია. დასავლეთ ევროპული პერსპექტივიდან კავკასიის ისტორია იმ დოზით არ არის გლობალურ ისტორიაში ინტეგრირებული, როგორც იმსახურებს. ამ ვორკშოპზე უფრო მეტს ვსწავლობ, ვიდრე ვასწავლი, რადგან მეხმარება ჩემს წარმოდგენათა გამრავალფეროვნებაში ამ თემატიკაზე", — ამბობს ბერლინის თავისუფალი უნივერსიტეტის დოქტორი სებასტიან კონრადი.

"ვორკშოპში მონაწილეობა ჩემთვის საინტერესო და მნიშვნელოვანია რამდენიმე მიზეზის გამო. ბერლინის თავისუფალ უნივერსიტეტში მოხარულები ვართ, კავკასიასთან, კერძოდ საქართველოსთან, კონტაქტების დამყარების გამო. ჩემთვის, როგორც შუასაუკუნეების ისტორიის სპეციალისტისთვის, ძალიან საინტერესოა იმის მოკვლევა, საქართველო რამდენად მნიშვნელოვანი იყო დასავლეთ ევროპისთვის შუა საუკუნეებში", — ამბობს ბერლინის თავისუფალი უნივერსიტეტის დოქტორი თომას ერტლი.

"ვორკშოპი მნიშვნელოვანია ახალგაზრდა მეცნიერთა კვლევებისთვის ახალი ხედვებისა და პერსპექტივების შესაძენად. საქართველოში უამრავი ისტორიული წყარო გვაქვს დასამუშავებელი და გამოსაკვლევი სხვადასხვა დისკუსიის ფარგლებში", — ამბობს მაია დამენია, ილიას სახელმწიფო უნივერსიტეტის დოქტორი.