ამის შესახებ ქართული კინო ინდუსტრიის წარმომადგენლები მიმართვას ავრცელებენ.

რატომ არის მნიშვნელოვანი: ამბობენ, რომ 2015 წლის თებერვლიდან საქართველო არის ევროკავშირის კულტურის, შემოქმედებითი და აუდიოვიზუალური ინდუსტრიების მხარდამჭერი პროგრამის შემოქმედებითი ევროპა წევრი.

• ამასთან საქართველო აღმოსავლეთ პარტნიორობის ქვეყნებს შორის დაფინანსებული პროექტების რაოდენობის მიხედვით ყველაზე წარმატებულ ქვეყანას წარმოადგენს.
• მათი თქმით, MEDIA ქვეპროგრამაში ისევე, როგორც ინტერ სექტორულ მიმართულებაში საქართველოს მონაწილეობის გაგრძელების საკითხი მთლიანად დამოკიდებულია აუდიოვიზუალური მედია სერვისების შესახებ ევროპული საბჭოს დირექტივასთან (AVMSD 2010/13/EU) საქართველოს თავსებადობაზე.
• რის თაობაზეც ევროკომისიისთვის მტკიცებულების წარდგენა 2023 წლის 31 მაისამდე უნდა მოხდეს.
• განმარტავენ, რომ MEDIA ქვეპროგრამის სრული წევრობა ქართულ კინო და აუდიოვიზუალურ ინდუსტრიას მისცემს სამომავლო განვითარების ძალიან დიდ პერსპექტივას და ხელს შეუწყობს მის სრულფასოვან ინტეგრაციას თანამედროვე ევროპულ და საერთაშორისო კინო ინდუსტრიაში.

დეტალები: ქართული კინო ინდუსტრიის წარმომადგენლების თქმით, გამომდინარე იქიდან, რომ განახლებული დოკუმენტის წარსადგენად ძალიან მცირე დროა, ისინი მზად არიან აქტიურად ითანამშრომლონ პარლამენტთან, რათა არ დაკარგონ ქართული კინო და აუდიოვიზუალური ინდუსტრიის განვითარების შანსი.

• ამბობენ, რომ 2015-2020 წლებში პროგრამის დაფინანსებით საქართველოში განხორციელდა 33 წარმატებული პროექტი.
• ხოლო ახალი პროგრამის შემოქმედებითი ევროპა 2021-2027 პირველივე წელს დაფინანსება 6 ქართულმა პროექტმა მოიპოვა.
• განმარტავენ, რომ შემოქმედებითი ევროპა 2021-2027 სამ ქვეპროგრამას მოიცავს: კულტურა, MEDIA და ინტერსექტორული მიმართულებები.
• აუდიოვიზუალური და კინო ინდუსტრიის მხარდამჭერი ქვეპროგრამა MEDIA, პროგრამის სრული ბიუჯეტის 2,44 მილიარდი ევრო, 58% ფინანსდება.

ქვეპროგრამა სხვადასხვა კლასტერისგან: Content, Audience, Business, Policy, შედგება და მხარს უჭერს სხვადასხვა მიმართულებებს.

• ევროპული ფილმების წარმოებას და ევროპული დაფინანსების მოპოვებას;
• ევროპულ კოპროდუქციებს;
• პოსტ-პროდუქციას;
• ფილმების ევროპულ და საერთაშორისო ბაზრებზე დისტრიბუციას, გაქირავებასა და გაყიდვას;
• სატელევიზიო სერიალების წარმოებას, დისტრიბუციასა და გაყიდვებს;
• აფინანსებს ევროპულ კინოფესტივალებსა და კინოფესტივალების ქსელებს;
• კინო საგანმანათლებლო პროექტებით ხელს უწყობს აუდიტორიის, განსაკუთრებით ახალგაზრდა აუდიტორიის დაინტერესებას თანამედროვე ევროპული კინოთი;
• მხარს უჭერს ევროპული კინოს პოპულარიზაციას მაყურებელში;
• აფინანსებს ფილმების სუბტიტრირებას ევროპული და საერთაშორისო ბაზრებისათვის;
• ხელს უწყობს ევროპული კინოთეატრების განვითარებას;
• აფინანსებს ვიდეო თამაშებისა და Immersive პროექტების განვითარებას;
• ხელს უწყობს ევროპელი კინო პროფესიონალების კვალიფიკაციის;
• ამაღლებას და ინტეგრაციას ევროპულ და საერთაშორისო კინო ინდუსტრიაში;
• აფინანსებს VOD პლატფორმებს.

კინო ინდუსტრიის წარმომადგენლები ამბობენ, რომ საქართველო MEDIA ქვეპროგრამის ნაწილობრივი წევრია და მონაწილეობის მიღება დაფინანსების რამდენიმე სქემებში შეუძლია.

• კინო განათლება და აუდიტორიის განვითარება, კინოფესტივალები, კინოფესტივალების ქსელები, ტრენინგები.
• ხაზს უსვამენ იმ გარემოებას, რომ დირექტივის განხორციელება საქართველოს არა მარტო MEDIA ქვეპროგრამის ნაწილობრივ წევრობას შეუნარჩუნებს.
• არამედ საშუალებას მისცემს გახდეს ქვეპროგრამის სრული წევრი, რისკენაც უკვე წლებია მივისწრაფვით ქართული კინო ინდუსტრიის პროფესიონალები.
• ამბობენ, რომ მზად არიან შექმნან კინო-პროფესიონალების სამუშაო ჯგუფი, რომელიც სახელმწიფო სტრუქტურებთან ერთად ჩაერთვება აღნიშნულ დოკუმენტზე მუშაობის პროცესში.
• რაც დააჩქარებს პროცესს და ხელს შეუწყობს მის სრულფასოვნებას.
• "ამიტომაც ვიმედოვნებთ გაითვალისწინებთ ჩვენს მზაობას ამ კანონზე სამუშაოდ, რათა მოცემულ ვადებში შევძლოთ ჩვენთვის მნიშვნელოვანი დოკუმენტის დასრულება", — ნათქვამია მიმართვაში.