რუსეთის პრეზიდენტმა, ვალიდემრ პუტინმა ფილმში "ინტერვიუ პუტინთან" რეჟისორს, ოლივერ სტოუნს "რუსეთის ავიაციის მუშაობა" აჩვენა. თუმცა როგორც რუსული ტელეარხი დოჟდი იუწყება, კადრები, სინამდვილეში, ავღანეთში, ამერიკული ვერტმფრენის თავდასხმას ასახავდა.

გამომძიებელთა დამოუკიდებელი ჯგუფის, Conflict Intelligence Team (CIT) მტკიცებით, აღნიშნული ვიდეო 2013 წლით თარიღდება და სადაც ამერიკული ვერტმფრენი ავღანეთში, თალიბებს ესხმის თავს, კადრებს კი პილოტების რუსული დიალოგი დაადეს. მსგავსი ვიდეო იუთუბზე 2016 წლის მარტში გამოქვეყნდა.

რუსეთის პრეზიდენტის პრეს-მდივანმა, დმიტრი პესკოვმა უარყო, რომ პუტინმა სტოუნს ამერიკული ვერტმფრენის თავდასხმის ვიდეო აჩვენა. "ეს ასე არ არის. სრული სისულელეა", - განაცხადა პესკოვმა.

ამერიკულმა არხმა Showtime 15-დან 17 ივნისის ჩათვლით ოლივერ სტოუნის ფილმი აჩვენა, რომელიც პუტინთან ინტერვიუზეა დაფუძნებული. ფილმი ოთხი სერიისგან შედგება.