საერთაშორისო რესპუბლიკურმა ინსტიტუტმა (IRI-მ) ახალი კვლევა გამოაქვეყნა.

რატომ არის მნიშვნელოვანი: საერთაშორისო რესპუბლიკური ინსტიტუტის ახალი საზოგადოებრივი აზრის კვლევა (Center for Insights in Survey Research) კიდევ ერთხელ აჩვენებს, რომ საქართველოს ევროკავშირში გაწევრიანებას მტკიცე მხარდაჭერა აქვს.

• გამოკითხულთა 89% სრულად ან მეტ-ნაკლებად უჭერს მხარს საქართველოს ევროკავშირში გაწევრიანებას — მხარდაჭერა, წინა კვლევასთან შედარებით, 4%-ით არის გაზრდილი და ისტორიულ მაქსიმუმს აღწევს.
• ამავდროულად, საქართველოს მოქალაქეები არ უჭერენ მხარს ქვეყანაში რუსეთის მოქალაქეების ყოფნას — გამოკითხულთა 79% წინააღმდეგია, მათ ბიზნესის რეგისტრაციის, ქონების შეძენის ან საქართველოში უვიზოდ შემოსვლის უფლება ჰქონდეთ.
• გარდა ამისა, კვლევის მიხედვით, პოლიტიკური პარტიების მიმართ ნდობის მაჩვენებელი დაბალია — გამოკითხულთა 42% აცხადებს რომ არცერთი პოლიტიკური პარტია არ გამოხატავს მათ ინტერესებს, ხოლო, საზოგადოების 78% -ს პოლიტიკაში მეტი ახალგაზრდის ხილვა სურს.

კვლევის თანახმად, რეიტინგში პირველ ადგილზე კვლავ პატრიარქი, ილია მეორეა — ის გამოკითხულთა 91%-ს მოსწონს.

• მეორე ადგილზეა თბილისის მერი, კახა კალაძე 52%-ით.
• რეიტინგში მესამე ადგილს პრეზიდენტი, სალომე ზურაბიშვილი იკავებს. ის გამოკითხულთა 48%-ის კეთილგანწყობას იმსახურებს.
• მეოთხე და მეხუთე ადგილებს მოქმედი და ყოფილი პრემიერმინისტრები ინაწილებენ — ირაკლი ღარიბაშვილი გამოკითხულთა — 43%-ს, გიორგი გახარია კი 36%-ს მოსწონს.

შედარება: 2022 წლის ნოემბრის გამოკითხვის თანახმად, რეიტინგები ასე ნაწილდებოდა:

• 88% — ილია მეორე;
• 51% — კახა კალაძე;
• 44% — ირაკლი ღარიბაშვილი;
• 40% — ანა დოლიძე.

ინსტიტუციების რეიტინგი: კვლევის თანახმად, პირველ ადგილს ქართული ჯარი იკავებს — ის გამოკითხულთა 77%-ს მოსწონს.

• მეორე ადგილზე საპატრიარქოა (72%), მესამეზე კი — პოლიცია (63%).
• ქართული მედია რეიტინგში მე-4 ადგილს იკავებს. ის გამოკითხულთა 62%-ს მოსწონს.

პარტიული რეიტინგები: როგორც ყოველთვის, პირველ ორ ადგილს ქართული ოცნება და ნაციონალური მოძრაობა იყოფს, მათ შორის სხვაობა მხოლოდ 5%-ა.

• ქართული ოცნება — 19%;
• ნაციონალური მოძრაობა — 14%;
• გახარიას პარტია — 3%;
• გირჩი — მეტი თავისუფლება — 3%;
• ლეიბორისტული პარტია — 2%;
• ლელო — 2%;
• გირჩი — 2%.

კვლევის მიხედვით, ენმ და ქართული ოცნება არიან ლიდერები იმ პარტიებს შორისაც, რომლებიც მოქალაქეებს არ მოსწონთ.

• კერძოდ, კითხვაზე რომელ პარტიებს არ დაუჭერდით ხმას არავითარ შემთხვევაში, ასეთის არსებობის შემთხვევაში — 39% ენმ-ს პასუხობს, 34% კი ქართულ ოცნებას.
• 16% — ალტინფოს;
• 13% — გირჩი მეტი თავისუფლებას;
• 13% — პატრიოტთა ალიანსს;
• 13% — გირჩს;
• 13% — ევროპულ საქართველოს.

მეთოდოლოგია: IRI-ის ინფორმაციით, კვლევა ჩატარდა 2023 წლის 4-23 მარტის პერიოდში საერთაშორისო რესპუბლიკური ინსტიტუტის კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ.

• საველე სამუშაოები ჩატარდა IPM-ის მიერ, მონაცემები შეგროვდა პირისპირ ინტერვიუს გზით.
• შერჩევა მოიცავდა საარჩევნო ხმის უფლებისა და ასაკის მქონე 1 500 რესპონდენტს.
• მონაცემები შეწონილ იქნა ასაკის, სქესის, რეგიონისა და დასახლების ზომის შესაბამისად.
• ცდომილების ზღვარი წარმოადგენს +/- 2.5 %, გამოპასუხების მაჩვენებელი — 63%.
• კვლევის განხორციელება შესაძლებელი გახდა ამერიკელი ხალხის მხარდაჭერით, აშშ-ის საერთაშორისო განვითარების სააგენტოს მეშვეობით.