აზერბაიჯანში, ნასიმის რაიონულმა სასამართლომ, დაკავებულ ჟურნალისტს, აფგან მუხტარლის შინაპატიმრობაზე უარი თქვა. სასამართლო სხდომა, გუშინ 20 ივნისს გაიმართა. ამის შესახებ, Meydan TV წერს.

ბრალდების მხარის წარმომადგენელმა, ჰასან ნაგიევმა განაცხადა, რომ თუკი მუხტარლის ციხიდან გაუშვებენ, არსებობს ქვეყნიდან გაქცევის საფრთხე.

გამოცემის ცნობით, აფგან მუხტარლი შეეწინააღმდეგა გამომძიებლის არგუმენტს, თუმცა მოგვიანებით, მოსამართლე ბაბეკ პანაჰოვმა არ დააკმაყოფილა დაცვის მხარის შუამდგომლობა.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.