საქართველოს პრეზიდენტმა უარი თქვა პარლამენტის თხოვნაზე რიგგარეშე სხდომის მოწვევასთან დაკავშირებით. მიუხედავად იმისა, რომ მმართველ გუნდს შეუძლია პრეზიდენტს გვერდი აუაროს, მარგველაშვილის თავიგადაწყვეტილებას პოლიტიკური შინაარსით ხსნის.

გიორგი მარგველაშვილის თქმით, საპარლამენტო უმრავლესობამ უარი თქვა პროპორციულ სისტემაზე გადასვლაზე და შესაბამისი ცვლილების კონსტიტუციის ახალ რედაქციაში შეტანაზე. მისივე მტკიცებით, ამ გადაწყვეტილებით ჩანს, რომ რეალურად, კონსტიტუციური ცვლილებები მხოლოდ პრეზიდენტის ინსტიტუტის შეკვეცას ითვალისწინებს:

"ეს ეხება პრეზიდენტის არჩევის წესს, ეხება უმაღლესი მთავარსარდლის ფუნქციებს და უფლებებს. ეს ეხება კონსტიტუციიდან უშიშროების საბჭოს გაქრობას. ანუ, რის თაობაზეც ჩვენ თავიდანვე ვსაუბრობდით მაშინ, როდესაც იქმნებოდა საკონსტიტუციო კომისია, იმ სულისკვეთებაზე, რომელზეც მოგახსენებდით, რომ მიმართულია რეალურად პრეზიდენტის ინსტიტუტის წინააღმდეგ, საბოლოოდ მივედით სწორედ ამ ვერსიამდე."

პრეზიდენტის თქმით, ისეთი კონსტიტუციის განსახილველად, როგორიც თავად დაახასიათა, რიგგარეშე სხდომას არ დანიშნავს. მარგველაშვილი მოუწოდებს ქართულ ოცნებას, გააგრძელოს კონსტიტუციის ახალ რედაქციაზე მუშაობა, არ მიიღოს შეუთანხმებელი ცვლილებები და გაითვალისწინოს ვენეციის კომისიის შემოთავაზებული რეკომენდაციები:

"შევქმნათ ერთიანი თანხმობის დოკუმენტი, რომელიც კონსენსუსზე და ვენეციის კომისიის მიერ შემოთავაზებულ ფუნდამენტურ პრინციპებზე იქნება დაფუძნებული. ნუ შევუქმნით პრობლემას ქართული დემოკრატიის განვითარებას. მე იმედი მაქვს, რომ ამ რთულ ვითარებაში პატივცემული დეპუტატები, საპარლამენტო უმრავლესობა არ იქნება ჩართული უაღრესად დასწრაფებულ რეჟიმში და გააგრძელებს კონსტიტუციის განხილვას, სწორედ ჩემს მიერ შემოთავაზებული პრინციპების ირგვლივ."