რატომ არის მნიშვნელოვანი: ალექსეი ნავალნი ვლადიმერ პუტინის მთავარი ოპიზიციონერია, რომელსაც არაერთი წელი დევნიდნენ, მოწამლეს და ახლა პატიმრობაშია.

  • ინსტაგრამზე გამოქვეყნებულ განცხადებაში ნავალნი ხაზს უსვამს, რომ პირადად არ იცნობს სააკაშვილს და არც ვინმე სხვას მისი გუნდიდან, შესაბამისად არავის უთხოვია მხარდამჭერი პოსტის დაწერა.
  • ის ამბობს, რომ სააკაშვილი იტანჯება და გადაწყვიტა ამაზე დაეწერა, რადგან ძნელი საყურებელია.
  • იქვე კიდევ ერთხელ ბოდიშს უხდის ქართველებს 2008 წლის ომის დროს შეურაცმხყოფელი.

დეტალები: ნავალნი ამბობს, რომ ყოფილი პრეზიდენტის პატიმრობა და ტანჯვა უგულობაა და გავლენას ახდენს ევროპულ არჩევანსა და განვითარებაზე, აქვეითებს მორალს და ავსებს ქვეყანას ბოროტებით.

  • "სააკაშვილი იტანჯება, მისი ოჯახი იტანჯება და მთელი საქართველო ცუდადაა იმის გამო, რაც ხდება და ამაში კარგი არაფერია მათთვისაც, ვისაც სურს სააკაშვილის სიკვდილამდე ციხეში ყოფნა", — წერს ის.
  • მისივე თქმით, გასაგებია, რომ ეს დაპირისპირება სასტიკი და ემოციებით სავსეა და ეჭვი არ ეპარება, რომ ოპონენტებს შურისძიების მიზეზი აქვთ, მაგრამ ამ შურისძიებით მთელი საქართველო დაზარალდება.
  • "მე მჯერა საქართველოს ბედნიერი ევროპული მომავლის. ეს არის მაგარი ქვეყანა, რომელსაც აქვს ყველაფერი კეთილდღეობისთვის. მჯერა, რომ პოლიტიკური დაპირისპირება (და სად არის დაპირისპირება?) მშვიდობიანად და უსაფრთხოდ მოგვარდება", — წერს ის.
  • ნავალნი ამბობს, რომ ხელისუფლება უფრო მოწყალე უნდა იყოს, ვიდრე მისი ოპონენტები, რადგან ის არის ძალაუფლება.
  • "სააკაშვილი ძალიან ავად არის და სიმულაციაზე ყველა საუბარი სისულელეა. დამიჯერეთ, ციხე ყველას ართმევს ჯანმრთელობას და დიდი სისწრაფით. მისი პირობითი სასჯელით სამკურნალოდ გათავისუფლება, ან ისეთი რამის გაკეთება, რაც მხარეებს კანონის დაცვისა და სახის გადარჩენის საშუალებას მისცემს, ყველაზე სწორი იქნება", — ამბობს ის.
  • პოსტში ნავალნი აქვეყნებს ექსპრეზიდენტის ფოტოს პალატიდან და ქართულენოვან წარწერას "ნეტარ არიან მოწყალენი, რამეთუ იგინი შეიწყალენ".
  • იქვე ოპოზიციონერი წერს, რომ სააღდგომო დღეები კარგი დროა, არც ისე მარტივი, მაგრამ გულკეთილი საქმის გასაკეთებლად და ერის შესარიგებლად, ამიტომ ქრისტიანულ რწმენაზე აპელირებით, ის მოუწოდებს მთავრობას და სააკაშვილის ყველა ოპონენტს, გადადგან ეს ნაბიჯი.