ამის შესახებ ზურაბ აზარაშვილმა მთავრობის ადმინისტრაციაში გამართულ ბრიფინგზე ისაუბრა.

რატომ არის მნიშვნელოვანი: აქონდროპლაზია იშვიათი გენეტიკური დაავადებაა, რომელიც ზრდის თანდაყოლილ დარღვევას იწვევს.

  • არაოფიციალური მონაცემებით, საქართველოში ამ დიაგნოზით — 16 ბავშვი, მსოფლიოში კი 250 000 ადამიანი ცხოვრობს.
  • აქონდროპლაზიის მქონე ბავშვების მშობლები წელიწადზე მეტია, უშედეგოდ ითხოვენ მათი შვილებისთვის სასიცოცხლოდ მნიშვნელოვანი წამლის შემოტანას, რომლის წლიური დოზაც, დაახლოებით, 200 000 დოლარი ჯდება.
  • ვოსორიტიდს აშშ-ის წამლისა და საკვების ადმინისტრაციისა (FDA) და ევროპის წამლის სააგენტოს (EMA) ავტორიზაცია 2021 წელს მიენიჭა. ის აქონდროპლაზიის სამკურნალო პირველი პრეპარატია.

დეტალები: მინისტრი ამბობს, რომ საბჭომ დეტალურად განიხილა იმ ქვეყნების მაგალითი, სადაც მედიკამენტი შეისწავლეს და სწორედ მათზე დაყრდნობით მიიღო უარყოფითი დასკვნა.

  • მისივე თქმით, აქტიური კომუნიკაცია ჰქონდათ ჯანმრთელობის მსოფლიო ორგანიზაციასთან და პაციენტების უფლებების დაცვის ევროპულ საზოგადოებებთან.
  • "ამ ეტაპზე შემიძლია, დაგიდასტუროთ, რომ საბჭოს ამ მედიკამენტის შესყიდვასთან დაკავშირებით სამინისტროსთვის დადებითი რეკომენდაცია არ მოუცია. გამომდინარე იქიდან, რომ მედიკამენტი, მათი შეფასებით, არის ექსპერიმენტული, არის დაკავშირებული სხვადასხვა გვერდით მოვლენასთან და არცერთ სხვა ქვეყანას სახელმწიფო დაფინანსებით აღნიშნული მედიკამენტის შეძენა დაწყებული არ აქვს".
  • აზარაშვილის მტკიცებით, ვოსორიტიდს ავტორიზაცია დაჩქარებული წესით მიენიჭა.