პრემიერმინისტრ ირაკლი ღარიბაშვილის განცხადება საქართველოს მთავრობის გვერდზე გამოქვეყნდა.

რატომ არის მნიშვნელოვანი: ღარიბაშვილი წერს, რომ 1917 წლის 25 მარტს ეკლესიის თვითმმართველობის აღდგენით ქართველი ხალხი დაუბრუნდა მართლმადიდებლობის უძველეს ტრადიციებს, დაიწყო ისტორიული სამართლიანობის აღდგენის მძიმე გზა და ამავე დროს, გადამწყვეტი ნაბიჯი გადაიდგა საქართველოს დამოუკიდებლობისკენ.

  • თუმცა არ ახსენებს რუსეთს, მაშინ როდესაც, სწორედ რუსეთმა გააუქმა საქართველოს ეკლესიის ავტოკეფალია 1811 წელს.
  • ეს პირველად არ ხდება — გასაბჭოების 102-ე წლისთავზე საქართველოს მთავრობის ვებგვერდზე პრემიერმინისტრის სახელით პოსტი გამოქვეყნდა, რომელშიც 1921 წელს საქართველოში საბჭოთა რუსეთის არმიის შემოჭრა და ანექსია "ტრაგიკულ მოვლენად" იყო მოხსენიებული, თუმცა არც რუსეთი, არც საბჭოთა არმია ნახსენები არ იყო.
  • მაშინ მოქალაქეებმა ეს გააპროტესტეს და პოსტის კომენტარებში მოუწოდებდნენ ირაკლი ღარიბაშვილს რუსეთზე ესაუბრა. იწერებოდა შემდეგი კომენტარები: "რუსეთი ოკუპანტია", "რუსეთი მტერია", "რუსეთი მკვლელია", "სამარცხვინოები ხართ".
  • თუმცა კომენტარების ნაწილს შლიდნენ, ხოლო პოსტს ბოტები ალაიქებდნენ.

დეტალები: ღარიბაშვილის განცხადებით, მადლიერების გრძნობით იხსენებს ქვეყნის საუკეთესო შვილებს, რომლებმაც ძალისხმევა არ დაიშურეს ისტორიული სამართლიანობის აღსადგენად.

  • "ქრისტიანული ღირებულებები საფუძვლად უდევს ქართველთა თვითშეგნებას და საუკუნეთა განმავლობაში განსაზღვრავს ჩვენს ისტორიას, ტრადიციებსა და კულტურას";
  • "თანამედროვე ეპოქაშიც, ევროპული საქართველოს შენებისას, სწორედ ის ტრადიციული ღირებულებები გვიმაგრებს ზურგს, რომელთაც დედაეკლესია განასახიერებს";
  • "ამდენად, დღევანდელ დღეს უდიდესი სიმბოლური მნიშვნელობა აქვს — ესაა ეკლესიის დამოუკიდებლობისა და ავტორიტეტის კიდევ ერთი დადასტურება, და ამავე დროს — აღიარება იმ მნიშვნელოვანი როლისა, რომელსაც ეკლესია ასრულებს ჩვენს საზოგადოებრივ ცხოვრებასა და უკეთესი მომავლის შენებაში", — ვკითხულობთ განცხადებაში.