გუშინ სამთავრობო მედიებმა გაავრცელეს ინფორმაცია, რომ მიხეილ ჩხენკელის გადაყენება იგეგმებოდა, რაც დღეს მთავრობამ დაადასტურა.

რატომ არის მნიშვნელოვანი: რუსული კანონის ჩაგდების შემდეგ მმართველ გუნდში საკადრო ცვლილებებზე საუბარი დაიწყო.

  • 18 მარტს, ბორჯომში უმრავლესობის შეხვედრა გაიმართა, რომელსაც რამდენიმე დეპუტატი და მინისტრი არ ესწრებოდა, მათ შორის, განათლების უწყების ხელმძღვანელი.
  • დღეს ქართული ოცნების დეპუტატმა, გია ვოლსკიმ თქვა, რომ შეხვედრაზე მიხეილ ჩხენკელთან დაკავშირებით, შესაძლო საკადრო გადაწყვეტილებაზე ისაუბრეს.

დეტალები: ჩხენკელი ქუთაისის საერთაშორისო უნივერსიტეტის საერთაშორისო მრჩეველთა საბჭოს თავმჯდომარე იქნება.

  • მინისტრის რანგში ის ყოველთვის კმაყოფილი იყო ამ უნივერსიტეტის საქმიანობით და მისი დაარსებისთვის ბიძინა ივანიშვილის მადლობას უხდიდა.
  • "უნივერსიტეტის იდეისა და კონცეფციის ავტორი ბატონი ბიძინა ივანიშვილია. სწორედ მისი და მისი ოჯახის უაღრესად მნიშვნელოვანი ქველმოქმედების შედეგად ქვეყანაში გაჩნდა მსოფლიო მასშტაბის აკადემიური და სამეცნიერო-კვლევითი სივრცე", — ამბობდა განათლების აწ უკვე ყოფილი მინისტრი.
  • მთავრობის ადმინისტრაციამ უკვე გაავრცელა ჩხენკელისა და პრემიერმინისტრ ღარიბაშვილის გამოსამშვიდობებელი შეხვედრის ამსახველი ფოტო და ვიდეო მასალა.
  • "ირაკლი ღარიბაშვილმა მიხეილ ჩხენკელს მინისტრობის პერიოდში გაწეული საქმიანობისთვის მადლობა გადაუხადა. თავის მხრივ, ყოფილმა მინისტრმა მადლობა გადაუხადა მთავრობის მეთაურს და აღნიშნა, რომ მისთვის დიდი პატივი იყო პრემიერმინისტრ ირაკლი ღარიბაშვილის გუნდში მუშაობა", — აცხადებენ ადმინისტრაციაში.