პოლონეთის ბიდგოშჩის თეატრმა ცოტა ხნის წინ ფეისბუქზე პოსტი გამოაქვეყნა, რომლითაც საქართველოში რუსული კანონის მიღება დაგმო და სამეფო უბნის თეატრს სოლიდარობა გამოუცხადა.

"საქართველოში გუშინ განვითარებული მოვლენების შემდეგ, როცა სასტიკად ჩაახშეს ახალი კანონპროექტის — რუსული კანონის ანალოგის — წინააღმდეგ გამართული აქცია, სრულ მხარდაჭერას ვუცხადებთ ქართველებს, მათ შორის, ჩვენს მეგობრებს სამეფო უბნის თეატრიდან. ამ კანონპროექტმა საერთაშორისო ასპარეზზე საქართველოს იზოლირება და ევროკავშირში გაწევრიანების შეფერხება შეიძლება გამოიწვიოს" , — ვკითხულობთ პოლონეთის ბიდგოშჩის თეატრის განცხადებაში.

ცოტა ხნის წინ სამეფო უბნის თეატრი რუსული კანონის მიღებას გამოეხმაურა. "ჩვენი მომავალი ევროპაშია! გაუმარჯოს თავისუფალ საქართველოს! გაუმარჯოს დამოუკიდებელ საქართველოს! გაუმარჯოს ევროპულ საქართველოს", — ვკითხულობთ სამეფო უბნის თეატრის ფეისბუქზე.

რუსული კანონი, რომელიც საფრთხეს უქმნის მედიას, არასამთავრობო ორგანიზაციებს, დასავლურ ინსტიტუტებსა და ქვეყნის ევროპულ მომავალს, უკვე უამრავი სფეროს წარმომადგენელმა გააკრიტიკა.