აჭარანეტი უარყოფს, რომ ბირჟა მაფიას კლიპში პოლიციელის დაფარვის მოთხოვნით სამართალდამცავები დაუკავშირდნენ. პორტალის მტკიცებით, მათ გადაღების მხოლოდ ტექნიკური მხარე უზრუნველყვეს, ხოლო კლიპის იდეისა და შინაარსის შექმნაში არ მონაწილეობდნენ:

"რამდენადაც ჩვენთვის ცნობილია, ვიდეოს დაბლარვა თავად პოლიციელის როლის შემსრულებელი მსახიობის მოთხოვნა იყო. ამასთანავე აჭარანეთს არ აქვთ წვდომა ბირჟა მაფიის YouTube-ის არხთან, სადაც მოხდა ვიდეოს განთავსება და დაბლარვა."

აღსანიშნავია, რომ მუსიკალურ ვიდეოში პოლიციის როლის შემსრულებლის, გიორგი გაგუას თქმით, მას არ უნდოდა ვიდეოს ნაწილი ყოფილიყო და რეპერებს მისი იუთუბიდან აღება სთხოვა, რაზეც უარი მიიღო. ის აღნიშნავს, რომ საბოლოოდ, კადრებს რეპერებმა, თავისი სურვილით, ბლარი დაადეს.

თავად ბირჟა მაფიის ერთ-ერთი წევრი, გიორგი ქებურია კი ამბობს, რომ პოლიციის მიერ აჭარანეტში განხორციელებული ზარის შესახებ მგალობლიშვილისგან გაიგო და ერთობლივად გადაწყვიტეს, რომ უმჯობესი იქნებოდა კონკრეტული კადრების დაფარვა.

ბირჟა მაფიას წევრებს, სააპელაციო სასამართლოს გადაწყვეტილებით, პატიმრობა გირაოთი შეეცვალათ და გიორგი ქებურიას 20, ხოლო მიშკა მგალობლიშვილს 50 ათასი ლარის გადახდა დააკისრათ. მათ სამართალდამცავები დიდი ოდენობით ნარკოტიკული საშუალება MDMA-ს შეძენა-შენახვას ედავებიან. რეპერების თქმით, მათ ნარკოტიკი ჩაუდეს და რეალურად, მათზე შური იმ კლიპის გამო იძიეს, სადაც პოლიციელი გააშარჟეს. ბრალის დამტკიცების შემთხვევაში რეპერებს 8-დან 20 წლამდე ან უვადო თავისუფლების აღკვეთა ემუქრებათ.

რეპერების მხარდამჭერი აქციის, საქართველოს პრემიერ-მინისტრის, ენერგეტიკის მინისტრისა და ბერა ივანიშვილის განცხადებების შემდეგ, 11 ივნისს, პროკურატურამ განაცხადა, რომ მგალობლიშვილისა და ქებურიას პატიმრობას აღარ მოითხოვდა. ამავე განცხადებით ცნობილი გახდა, რომ პროკურატურამ სამართალდამცავების მხრიდან, ბირჟა მაფიას წევრების დაკავების დროს, მტკიცებულებების შესაძლო გაყალბებაზე გამოძიება დაიწყო.

გაიგეთ მეტი: ბირჟა მაფიას წევრები გათავისუფლდნენ, მაგრამ მათ შესაძლო დანაშაულზე გამოძიება გრძელდება.