დღეს, 12 ივნისს, ბირჟა მაფიას წევრები, მიშკა მგალობლიშვილი და გიორგი ქებურია სასამართლომ, 50 და 20 ათასი ლარის გირაოს სანაცვლოდ გაათავისუფლა. თუმცა სამართალწარმოება გრძელდება და ბოლო ეტაპი, როდესაც მოსამართლემ რეპერების ბრალეულობა/უდანაშაულობა უნდა გადაწყვიტოს, მხოლო საქმის არსებითი განხილვაა.

საქართველოს ახალგაზრდა იურისტთა ასოციაციის იურისტი, გოგა ხატიაშვილი On.ge-სთან განმარტავს, რომ როდესაც პირველი ინსტანცია (ამ შემთხვევაში თბილისის საქალაქო სასამართლო) ბრალდებულს აღკვეთის ღონისძიებას უფარდებს, მისი გადაწყვეტილება 48 საათის განმავლობაში საჩივრდება სააპელაციო სასამართლოს საგამოძიებო კოლეგიაში.

საქალაქო სასამართლოს მიერ რეპერებისთვის აღკვეთის ღონისძიებად პატიმრობის გამოყენება მგალობლიშვილის და ქებურიას ადვოკატებმა გაასაჩივრეს. დღეს კი სააპელაციო სასამართლოში მხოლოდ აღკვეთის ღონისძიების საკითხი განიხილეს და არა – რეპერების ბრალეულობა.

როგორ განისაზღვრება გირაოს რაოდენობა?

გირაო არის აღკვეთის ღონისძიების სახე, რომელიც ბრალდებულებს იმ შემთხვევაში ეფარდებათ, მაგალითად, მათი მიმალვის, გამოძიებისთვის თავის არისდების, მოწმეებზე ზემოქმედებისა და სხვა საფრთხე. ზოგადად, გირაოს ოდენობა განისაზღვრებას ქონებრივი მდგომარეობის გათვალისწინებით.

ხატიაშვილის თქმით, მიუხედავად იმისა, დაცვის მხარე რა რაოდენობას შესთავაზებდა, აუცილებელი იყო, რომ სასამათლოს ქონებრივი მდგომარეობის საკითხი გამოერკვია. გირაოს გადახდა შესაძლებელია როგორც ფულადი სახით, ისე უძრავი ქონების უზრუნველყოფით.

თუ განაჩენის აღსრულებიდან ერთი თვის ვადაში რეპერები კეთილსინდისიერად მოიქცევიან და გირაო სხვა უფრო მკაცრი აღკვეთით არ შეიცვლება, ეს თანხები სახელმწიფოს არ რჩება და ისევ უკან უბრუნდება ბრალდებულებს.

ახლა რა ხდება?

ჯერჯერობით, საქმეზე გამოძიება გრძელდება. გამოძიების დასრულების შემდეგ, არის წინასასამართლო სხდომა, სადაც მოხდება მტკიცებულებათა გაფილტვრა. გოგა ხატიაშვილის თქმით, ორივე მხარე მოპოვებულ მტკიცებულებებს წარადგენს და ამ სხდომაზე გადაწყდება მტკიცებულებათა დასაშვებობის საკითხი.

თუ წინასასამართლო სხდომაზე, მხარეები იმდენ მტკიცებულებას წარმოადგენენ, რომ სასამართლო დარწმუნდება, ალბათობის მაღალი ხარისხით, რომ ბრალდებულებმა ნამდვილად ჩაიდინეს დანაშაული, საქმეს გადაიცემა არსებითად განსახილველად.

საქმის არსებითი განხილვა არის ბოლო ეტაპი, როდესაც მოსამართლემ დამნაშავეობა/უდანაშაულობის საკითხი უნდა გადაწყვიტოს.

ბირჟა მაფიას წევრებს, თბილისის საქალაქო სასამართლომ წინასწარი პატიმრობა შეუფარდა. მოგვიანებით, სააპელაციო სასამართლომ რეპერებს პატიმრობა გირაოთი შეუცვალა და გიორგი ქებურიას 20, ხოლო მიშკა მგალობლიშვილს 50 ათასი ლარის გადახდა დააკისრა. მათ სამართალდამცავები დიდი ოდენობით ნარკოტიკული საშუალება MDMA-ს შეძენა-შენახვას ედავებიან. რეპერების თქმით, მათ ნარკოტიკი ჩაუდეს და რეალურად, მათზე შური იმ კლიპის გამო იძიეს, სადაც პოლიციელი გააშარჟეს. ბრალის დამტკიცების შემთხვევაში რეპერებს 8-დან 20 წლამდე ან უვადო თავისუფლების აღკვეთა ემუქრებათ.

რეპერების მხარდამჭერი აქციის, საქართველოს პრემიერ-მინისტრის, ენერგეტიკის მინისტრისა და ბერა ივანიშვილის განცხადებების შემდეგ, 11 ივნისს, პროკურატურამ განაცხადა, რომ მგალობლიშვილისა და ქებურიას პატიმრობას აღარ მოითხოვდა. ამავე განცხადებით ცნობილი გახდა, რომ პროკურატურამ სამართალდამცავების მხრიდან, ბირჟა მაფიას წევრების დაკავების დროს, მტკიცებულებების შესაძლო გაყალბებაზე გამოძიება დაიწყო.