CNN-ის ინფორმაციით, ამერიკელი სტუდენტი, ოტო ვარმბაიერი, რომელიც ჩრდილოეთ კორეაში 17 თვის წინ დააპატიმრეს, გაათავისუფლეს. ამის შესახებ, მშობლები ავრცელებენ ცნობას:

"იგი უკვე აშშ-ში გაამგზავრეს. ჩრდილოეთ კორეის სისასტიკე და ტერორიზმი ოტოსა და ვარმბიერების ოჯახის მიმართ, დასრულებულია. მადლობა ღმერთს".

აღნიშნულ ინფორმაციას ადასტურებს აშშ-ის სახელმწიფო მდივანი რექს ტილერსონიც და ამბობს, რომ ოტო უკვე აშშ-სკენ მიემგზავრება.

ჯერჯერობით არ არის ცნობილი მისი ჯანმრთელობის მდგომარეობა.

22 წლის ამერიკელი სტუდენტი, ოტო ვარმაბიერი 2016 წლის იანვარში, ფხენიანის აეროპორტში დააკავეს, მაშინ როდესაც ის ჩრდილო კორეის დასატოვებლად ემზადებოდა. გასული წლის 16 მარტს მას ჩრდილოეთ კორეის სასამართლომ 15 წლით მძიმე შრომა მიუსაჯა.

ვირჯინიის უნივერსიტეტის სტუდენტი ჩრდილო კორეის დედაქალაქ ფხენიანში 29 დეკემბერს ჩავიდა. პირველ იანვარს მან სასტუმროს კედლიდან, რომელშიც რჩებოდა, პოსტერი ჩამოხსნა. ვარმბაიერის ქმედება ვიდეო-კამერებმა დააფიქსირეს.

ვარმბაიერს ბრალად ედებოდა ჩრდილოეთ კორეის რესპუბლიკის წინააღმდეგ მტრული ქმედება. დაკავების დღეს ის პრესისთვის გამართულ კონფერენციაზე წარსდგა, სადაც თქვა, რომ ნანობს თავის საქციელს.