ცოტა ხნის წინ ისლანდიიდან მანჩესტერისკენ მიმავალი მგზავრები დაუვიწყარი სანახაობის — ჩრდილოეთის ციალის — მომსწრენი გახდნენ. ამ საოცარი გამოცდილებით კი ყველა მგზავრმა ისიამოვნა, რაც გულისხმიერი პილოტის დამსახურებაა.

ადამ გროუვი საცოლესთან ერთად ისლანდიიდან ბრუნდებოდა: წყვილი იმედოვნებდა, რომ რამდენიმედღიანი მოგზაურობისას ჩრდილოეთის ციალს ნახავდნენ, მაგრამ იმედი გაუცრუვდათ.

მანჩესტერისკენ გზაზე პილოტმა თვითმფრინავში შუქი ჩააქრო, რათა მგზავრები ჩრდილოეთის ციალით დამტკბარიყვნენ, თუმცა საოცარი სანახაობა მხოლოდ თვითმფრინავის მარცხენა ფანჯრებიდან მოჩანდა, გროუვი და მისი საცოლე კი მარჯვნივ ისხდნენ. საბედნიეროდ, პილოტმა გადაწყვიტა, რომ ჩრდილოეთის ციალის ნახვას ყველა იმსახურებდა და თვითმფრინავი მოაბრუნა.

ფოტო: Adam Groves

"გვიხარია, რომ პილოტმა კონტროლირებადი მანევრი შეასრულა, რათა ციდან ბუნების საოცარი ხედის დანახვა ყველა მგზავრს შესძლებოდა", — აცხადებენ ავიაკომპანიის წარმომადგენლები.

როგორც ჩანს, შესაძლოა ყველაზე ჩვეულებრივი მომენტებიც კი არაჩვეულებრივად იქცეს, როცა გულისხმიერი ადამიანების გვერდით ხარ.