პაველ ჰერჩინსკიმ ამის შესახებ ინტერპრესნიუსისთვის მიცემულ ინტერვიუში ისაუბრა.

რატომ არის მნიშვნელოვანი: ოკუპანტი ქვეყნის საგარეო საქმეთა მინისტრმა, სერგეი ლავროვმა 18 იანვარს საქართველოსთან პირდაპირი ავიამიმოსვლის აღდგენის იმედი გამოთქვა.

  • სერგეი ლავროვმა შეაქო საქართველოს მთავრობა და თქვა, რომ სანქციებზე საქართველოს მთავრობის პოზიცია მის "პატივისცემას" იწვევს.
  • საპასუხოდ, ქართულ ოცნებაში თქვეს, რომ თუ ასე მოხდა, ეს მისასალმებელი იქნება.
  • უკრაინის საგარეომ ლავროვისა და კობახიძის განცხადებებს თბილისსა და მოსკოვს შორის რევერანსების გაცვლა უწოდა.

ჰერჩინსკის განცხადებით, უკრაინაში რუსეთის არაპროვოცირებული, გაუმართლებელი და უკიდურესად სასტიკი შეჭრის შემდეგ, ევროკავშირის 27-მა წევრმა ქვეყანამ რუსეთში და რუსეთიდან პირდაპირი ფრენების აკრძალვა ერთსულოვნად გადაწყვიტა.

  • "ეს გადაწყვეტილება მიღებულ იქნა არა მხოლოდ ევროკავშირის წევრი ქვეყნების, არამედ ბევრი სხვა თანამოაზრე ქვეყნის მიერ";
  • "საქართველოსა და საქართველოს ხელისუფლების გადასაწყვეტია, თუმცა ჩვენი თვალთახედვით, საქართველო თანხვედრაში უნდა მოდიოდეს ჩვენს პოზიციასთან, რამდენადაც ეს შესაძლებელია";
  • "მესმის ვითარების სენსიტიურობა, მაგრამ ველით, რომ საქართველო მიჰყვება ჩვენს პოზიციას იმდენად, რამდენადაც შესაძლებელია".

გარდა ამისა, მან ლავროვის მიერ საქართველოს ხელისუფლების ქებაზეც ისაუბრა და თქვა, რომ ეს რუსული პროპაგანდის ნაწილია.

  • "ცხადია, რომ ეს არის საქართველოსა და დასავლეთს შორის უთანხმოების ჩამოგდების კლასიკური გზა. ჩემი აზრით, ეს არის მცდელობა ევროკავშირის წევრობაზე საქართველოს მისწრაფებებისთვის ხელის შეშლის, გადადების ან კურსიდან გადახვევის";
  • "სულაც არ მიკვირს, რადგან ეს არის რუსეთის დეზინფორმაციისა და პროპაგანდის კლასიკური მაგალითი".