მარიამობის დღესასწაულზე მიხეილ ყაველაშვილის მიერ შეწყალებული დავით ხომერიკი საპატიმროს დატოვების დეტალებსა და პირველ განცდებზე "ტვ პირველის" ჟურნალისტთან საუბრობს. მისი თქმით, ციხის ადმინისტრაციის წარმომადგენლები საკანში მოულოდნელად შევიდნენ და პატიმრებს გათავისუფლების შესახებ აცნობეს.

"შემოვიდა იქაური პერსონალი და "სვეშამიო", უეცრად შოკში ჩავვარდით ყველანი, ჩემი და ბიჭების ჩათვლით. არ გვჯეროდა საერთოდ არაფერი... დაახლოებით იყო ცხრა, ცხრის ნახევარი. გულის სიღრმეში ყველას აქვს მოლოდინი, რომ უფრო ნაადრევად დატოვებენ იქაურობას და მალე ჩაეხუტებიან თავისი ოჯახის წევრებს. ანდრო ჭიჭინაძეც იყო ჩემთან ერთად. ირაკლი მიმინოშვილი — ჩვენი ღიმილა ბიჭი, გიორგი მჭედლიშვილს ალბათ არ იცნობთ, ეგეც...", — თქვა ხომერიკმა.

ხომერიკმა დეტალურად ისაუბრა ციხიდან გამოსვლის პროცედურასა და მეგობრებთან გამოთხოვებაზეც.

"15 წუთი დასჭირდა. მაჩქარებდნენ მერე უკვე, მეთქი ორი წუთი კიდევ დარჩები, რომ დავმშვიდობებოდი ბიჭებს. მერე უკვე ადმინისტრაციის შენობაში გადავედით, იქ ხელი მოგვაწერინეს რაღაც საბუთებზე, რომ გავდიოდით. ეგ იყო და შემდეგ არაფერი, გაგვიყვანეს გარეთ, ჭიშკარს გავცდით, შლაგბაუმს გავცდით და ეგ და ეგ იყო", — თვა მან.

საპატიმროს დატოვების შემდეგ დავით ხომერიკი პირდაპირ სახლში წავიდა. როგორც თავად ამბობს ტაქსის მძღოლმა იცნო და მგზავრობის საფასური არ გადაახდევინა. ადგილზე მისულმა ხომერიკმა პირველად ძმას დაურეკა.

"პირველი ჩემ ძმას დავურეკე. უბანში მივედი ტაქსით, ფული არ მქონდა, რა თქმა უნდა, და ჩემ ძმას გავძახე ქვემოდან: ზუკა-მეთქი და ერთი ამბავი ატეხა მაღლიდან, რომელი ხარო და რაღაცები რა ვიცი, მთელი უბანი შეძრა, მოკლედ, რა!", — თქვა ხომერიკმა.

შეგახსენებთ, დავით ხომერიკი, 2024 წლის 2 დეკემბერს თავდაპირველად გზის ხელოვნურად გადაკეტვის ბრალდებით დააკავეს. მოგვიანებით მას ზურგჩანთაში "მოლოტოვის კოქტეილების" პოვნა დააბრალეს და საბოლოოდ, ცეცხლის წაკიდების მომზადების მუხლით 4 წლით და 6 თვით პატიმრობა მიუსაჯეს.

ცნობისთვის, მარიამობის დღესასწაულთან დაკავშირებით, მიხეილ ყაველაშვილმა 226 მსჯავრდებული შეიწყალა. პრეზიდენტის ადმინისტრაციის ცნობით, შეწყალება შეეხო 217 საპატიმრო და 6 არასაპატიმრო სასჯელის მქონე პირს, ხოლო 3 პირს ნასამართლობა მოეხსნა.

შეწყალებულთა შორის აღმოჩნდნენ "რუსული კანონისა" და 2024 წლის ნოემბერ-დეკემბრის საპროტესტო აქციების, ასევე "4 ოქტომბრის საქმეზე" დაკავებული პირები — სულ 8 პირი.