მარიამობის დღესასწაულთან დაკავშირებით, მიხეილ ყაველაშვილმა 226 მსჯავრდებული შეიწყალა. პრეზიდენტის ადმინისტრაციის ინფორმაციით, შეწყალება შეეხო 217 საპატიმრო და 6 არასაპატიმრო სასჯელის მქონე პირს, ხოლო 3 პირს ნასამართლობა მოეხსნა.

"საქართველოს პრეზიდენტის მიერ მისთვის კონსტიტუციით ექსკლუზიური უფლებამოსილების გამოყენება ჰუმანიზმის პრინციპს და სახელმწიფო ინტერესს ეფუძნება", — წერია გავრცელებულ ინფორმაციაში.

შეწყალებულთა შორის აღმოჩნდნენ "რუსული კანონისა" და 2024 წლის ნოემბერ-დეკემბრის აქციებისა და 4 ოქტომბრის საქმეზე დაკავებული პირები, სულ 8 პირი.

შეწყალებულთა შორისაა 4 ოქტომბრის საქმეზე დაკავებულები 3 პირი:

მიხეილ ყაველაშვილმა 4 ოქტომბრის საქმეზე დაკავებული 3 პირი – ავთანდილ თოფჩიშვილი, თორნიკე მჭედლიშვილი და სიმონ მახარაძე შეიწყალა.

თორნიკე მჭედლიშვილს 5 წლით თავისუფლების აღკვეთა ჰქონდა მისჯილი;

ავთანდილ თოფჩიშვილმა და სიმონ მახარაძემ რამდენიმე თვის წინ საპროცესო შეთანხმებები გააფორმეს. მათ ერთწლიანი პატიმრობა და 3 წელი პირობითი ჰქონდათ მისჯილი.

"რუსული კანონის" საწინააღმდეგო აქციაზე დაკავებული ფრიდონ ბუბუტეიშვილი:

მიხეილ ყაველაშვილმა მარიამობის დღესასწაულთან დაკავშირებით, ე.წ. რუსული კანონის დროს მიმდინარე აქციების დროს დაკავებული ფრიდონ ბუბუტეიშვილი შეიწყალა.

მას 2025 წლის 20 იანვარს 5-წლიანი პატიმრობა მიესაჯა. ბუბუტეიშვილს ქვის სროლით მეხანძრე-მაშველის დაშავებასა და პარლამენტის ჭიშკრის დაზიანებას ედავებოდნენ. 2026 წლის 8 მაისს გავრცელდა ინფორმაცია, რომ მან ყაველაშვილს შეწყალების თხოვნით მიმართა

პროევროპული აქციების დროს დაკავებული 4 პირი:

ყაველაშვილის მიერ შეწყალებულთა შორის არიან 2024 წლის ნოემბერ-დეკემბრის პროევროპული აქციების 4 მონაწილე — საბა ჯიქია, დავით ხომერიკი, დანიელ მუმლაძე და გურამ ხუტაშვილი შეიწყალა:

დავით ხომერიკი 2024 წლის 2 დეკემბერს ჯერ გზის ხელოვნურად გადაკეტვისთვის დააკავეს, შემდეგ კი ზურგჩანთაში "მოლოტოვის კოქტეილები" უპოვეს. ის საბოლოდ ცეცხლის წაკიდების მომზადებაში დაადანაშაულეს და 4 წლით და 6 თვით პატიმრობა მიუსაჯეს;

18 წლის სტუდენტ საბა ჯიქიას 2025 წლის 10 ივლისს 4 წლით და 6 თვით პატიმრობა მიუსაჯეს. მას პროკურატურა პოლიციელზე თავდასხმას ედავებოდა;

დანიელ მუმლაძესა და გურამ ხუტაშვილს სამეთვალყურეო კამერის დაზიანებას ედავებოდნენ. მათ 2025 წლის 2 ივნისს 3-3 წლით თავისუფლების აღკვეთა მიუსაჯეს