ინფორმაცია ამის შესახებ უკრაინის მმართველი პარტიის, ხალხის მსახურის თავმჯდომარემ, დავით არახამიამ დაადასტურა.

რატომ არის მნიშვნელოვანი: აქამდე უკრაინის მთავრობაში უწყების ხელმძღვანელები პირდაპირ გაათავისუფლეს პოსტებიდან, რეზნიკოვს კი, როგორც არახამია ამბობს, სტრატეგიული მრეწველობის მინისტრად დანიშნავენ.

  • მისივე თქმით, თავდაცვის უწყებას სათავეში დაზვერვის მთავარი სამმართველოს უფროსი, კირილო ბუდანოვი ჩაუდგება, "რაც ომის დროს აბსოლუტურად, ლოგიკურია".
  • "ლოგიკა იგივეა. ძალოვან უწყებებს ამ ეტაპზე, არა პოლიტიკოსები, არამედ ძალოვანი სტრუქტურების წარმომადგენლები უნდა ხელმძღვანელობდნენ", — ამბობს არახამია.

რეზნიკოვის განცხადებით, საკადრო ცვლილებებზე ინფორმირებული არ იყო. როგორც ის ამბობს, ასეთი შეთავაზება რომ მიეღო, უარს იტყოდა, რადგან შესაბამისი გამოცდილება არ აქვს და ფიქრობს, რომ ეს შეცდომაა.

  • "შემიძლია ვთქვა, რომ ეს ჩემთვის სიახლეა. სტრატეგიული მრეწველობის სამინისტროს შესახებ უკრაინის პრეზიდენტთან საუბარი არც ერთხელ არ მქონია".
  • თავდაცვის მინისტრი ICTV-სთან ინტერვიუში აღნიშნავს, რომ ასეთი პროცედურა, მთავრობის შიგნით მინისტრიდან მინისტრად გადაყვანაზე, არ არსებობს და განმარტავს, რომ ეს პარლამენტის გადაწყვეტილებით, პრემიერის მოთხოვნის შემთხვევაში ხდება.

კონტექსტი: შესაძლოა, რეზნიკოვის გათავისუფლება და სხვა პოსტზე დანიშვნა, 21 იანვარს მედიაში გავრცელებულ ინფორმაციას უკავშირდებოდეს, რომლის მიხედვითაც, უწყება სამხედროებისთვის საკვებს ბაზარზე არსებულ ფასთან შედარებით 2-3-ჯერ ძვირად ყიდულობს.

  • ინფორმაციას თავდაცვის უწყება მალევე გამოეხმაურა და მას "სიცრუე და მანიპულაცია" უწოდა, რომელიც საზოგადოების მიზანმიმართულად შეცდომაში შეყვანის მცდელობის ნიშნებს შეიცავს.
  • სამინისტრომ უკრაინის უსაფრთხოების სამსახურებს გამოძიების ჩატარებაც სთხოვა.