მიუნხენის უსაფრთხოების კონფერენციაზე რუსეთის ხელისუფლების ნაცვლად სამოქალაქო საზოგადოებისა და ოპოზიციის წარმომადგენლები, კერძოდ, გარი კასპაროვი და მიხაილ ხოდორკოვსკი მიიწვიეს.

რატომ არის მნიშვნელოვანი: მიუნხენის უსაფრთხოების კონფერენცია 1962 წლიდან იმართება და მასში რუსეთი 1999 წლიდან მონაწილეობდა.

  • 2007 წელს კონფერენციას რუსეთის პრეზიდენტი, ვლადიმერ პუტინი დაესწრო, სადაც მისი ე.წ. "მიუნხენის გამოსვლა" შედგა.
  • მან გააკრიტიკა "მსოფლიოს უნიპოლარული მოდელი", შეერთებული შტატები და ნატო.
  • ეს გამოსვლა რუსეთსა და დასავლეთს შორის ურთიერთობების გაუარესების ერთ-ერთ ამოსავალ წერტილად ითვლება.

დეტალები: წელს მიუნხენის უსაფრთხოების საერთაშორისო კონფერენციის ორგანიზატორებმა რუსეთის მთავრობის წარმომადგენლების მოწვევაზე უარი განაცხადეს.

  • "განცხადებები, რომლებიც ყოველდღიურად გვესმის კრემლიდან, არ იძლევა საშუალებას დავასკვნათ, რომ რუსეთი ერთი იოტითაც დაიხევს უკან პუტინის ომის მიზნისგან, რაც უკრაინის განადგურებაა", — განმარტა კონფერენციის თავმჯდომარემ, კრისტოფ ჰეუსგენმა.
  • მისივე განცხადებით, არ სურს ავტორიტეტული საერთაშორისო უსაფრთხოების ფორუმის ტრიბუნა პუტინს თავისი პროპაგანდისტული იდეების გავრცელებისთვის დაუთმოს.