ნოდარ მელაძე რუსთავი 2-ის საინფორმაციო სამსახურის უფროსად დაინიშნა. ამის შესახებ ინფორმაცია On.ge-ს თავად ნოდარ მელაძემ დაუდასტურა.

როგორც მელაძე ამბობს ამ თანამდებობაზე მუშაობას ის გუშინ, 7 ივნისს დათანხმდა. მან გიორგი ლაფერაშვილი შეცვალა, რომელიც საინფორმაციო სამსახურს 2014 წლიდან ხელმძღვანელობდა.

როგორც მელაძე ამბობს, გიორგი ლაფერაშვილი პოლიტიკური ტოქ-შოუების მაუწყებლობისა და დილისა და შუადღის მაუწყებლობის ხემძღვანელი იქნება. ტოქ-შოუების მაუწყებლობას მანამდე მელაძე ხელმძღვანელობდა.

On.ge მელაძეს 6 ივნისსაც ესაუბრა, თუმცა, მაშინ მან არ ისაუბრა საინფორმაციო სამსახურის ხელმძღვანელის თანამდებობაზე მისი კანდიდატურის განხილვის შესახებ. დღეს კი, კურიერის ახალი ხელმძღვანელი ამბობს, რომ ამ თანამდებობაზე დანიშვნის შესახებ მისთვის მანამდეც ცნობილი იყო.

"ძალიან დიდი ხანი ვმუშაობდი საინფორმაციო სამსახურში. დაახლოებით რვა წლის განმავლობაში და ყოველთვის ახლო სფერო იყო ჩემთვის ახალი ამბების სამსახური. არხის მენეჯმენტმა დამინახა მე, რომ ამ მიმართულებით შემიძლია გავაგრძელო მუშაობა, რატომაც არა?" - აღნიშნა მელაძემ.

მელაძე აგრძელებს კურიერის P.S-სთვის მუშაობას და კვლავ რჩება ტელეკომპანიის ვებგვერდის ხელმძღვანელად.

მელაძის საინფორმაციო სამსახურის ხელმძღვანილის თანამდებობაზე დანიშვნასთან დაკავშირებით On.ge-მ 7 ივნისს არხის გენერალურ დირექტორს, ნიკა გვარამიასაც ჰკითხა.

"ძალიან მკითხაობთ თქვენ. გადაწყვეტილებები იქნება მიღებული ცალკეულ საკითხებთან დაკავშირებით, რაც რეორგანიზაციის ფარგლებში ჩაჯდება. ამაზე მეტის თქმა ახლა არ შემიძლია."

On.ge-ს სატელეფონო ზარებს არხის ხელმძღვანელი ნიკა გვარამია და საინფორმაციო სამსახურის ყოფილი ხემძღვანელი ამ ეტაპზე არ პასუხობენ.