გერმანულენოვან ქართველ მწერალს, დრამატურგსა და თეატრის რეჟისორს, ნინო ხარატიშვილს, კარლ ცუკმაიერის მედალი გადაეცა. აღნიშნული პრიზი გერმანიაში, რაინლანდ-პფალცის მიწაზე გაიცემა "გერმანული ენისა და მხატვრული სიტყვის" წინაშე დამსახურებისთვის. რაინლანდ-პფალცის ოფიციალურ ვებგვერდზე ნინო ხარატიშვილი "ერთ-ერთ უდიდეს გერმანულენოვან მთხრობლად" არის მოხსენიებული.

"ნინო ხარატიშვილს არაჩვეულებრივად გამოსდის თავშესაქცევისა და პოზიციის, ცალკეული ადამიანების ბედისწერისა და ისტორიის შერწყმა", — აცხადებს რაინლანდ-პფალცის ლიდერი მალუ დრაიერი, — "უკრაინის წინააღმდეგ რუსეთის სამხედრო აგრესიის ფონზე, მისი რომანები შემაშფოთებლად რელევანტურია. ისინი ჰყვებიან დრამებსა და ტრაგედიებს, რომლებიც ლამის ანტიკურ ნამუშევრებს უტოლდებიან, სვამენ მნიშვნელოვან შეკითხვებს ბრალეულობასა და პასუხისმგებლობაზე, ომის ხანგრძლივ შედეგებსა და დანაშაულზე.

"მის რომანებში შავბნელი მხარეცაა, თუმცა, ამის მიუხედავად, სინათლე არასდროს ქრება. ასეთი ოპტიმიზმით იგი ძალიან ჰგავს დიდებულ კარლ ცუკმაიერს".

კარლ ცუკმაიერი მე-20 საუკუნეში მოღვაწე გერმანელი მწერალი და დრამატურგი გახლდათ. მისი სახელობის მედალი რაინლანდ-პფალცის მიწაზე 1979 წლიდან გაიცემა. ამ პრიზის ლაურეატები სხვადასხვა წელს გახდნენ ისეთი ცნობილი მწერლები, როგორებიც არიან ფრიდრიხ დიურენმატი და ჰერტა მიულერი.

ფოტო: Picture Alliance / NEWS AGENCY / Henrik Montgomery

რაც შეეხება ნინო ხარატიშვილს, ეს მისთვის, რასაკვირველია, პირველი აღიარება არაა. არაერთი ბესტსელერის ავტორი ბუკერის საერთაშორისო პრემიისა და დუბლინის ლიტერატურული პრემიის ნომინანტიცაა. 2014 წელს გამოცემული მისი მასშტაბური რომანი, მერვე სიცოცხლე, ბევრ ქვეყანაში, მათ შორის საქართველოში, ბესტსელერად იქცა. ხარატიშვილი "ტოლსტოის მემკვიდრედაც" მოუხსენიებიათ. მისი წიგნები მსოფლიოში მილიონზე მეტ ეგზემპლარადაა გაყიდული.

სულ რამდენიმე კვირის წინ ქართულად ითარგმნა მწერლის ამ დროისთვის ბოლო რომანი — უკმარი სინათლე. აღნიშნული წიგნი გასულ წლის ბერლინალეზე იმ 10 საუკეთესო რომანს შორის დაასახელეს, რომელთა ეკრანიზაციასაც კინოხელოვანებს ურჩევენ. ჯერ კიდევ ორიგინალურ ენაზე გამოცემამდე ხარატიშვილის ამ ნაწარმოების თარგმნის უფლება 10-ზე მეტ ქვეყანაში გაიყიდა, მათ შორის, მსოფლიოს ერთ-ერთ უდიდეს გამომცემელ HarperCollins-ზე. აღსანიშნავია ისიც, რომ ქართულ ენაზე წიგნის გამოცემიდან სამ დღეში ტირაჟი სრულად გაიყიდა.

ასევე იხილეთ: