ლელო — ძლიერი საქართველოს მიერ გავრცელებულ განცხადებას, სადაც პარტიამ დაწერა, რომ ქართულ ოცნებასთან მოლაპარაკებები აუცილებელია, ოპოზიციონერი პოლიტიკოსები გამოეხმაურნენ.

ფედერალისტების ერთ-ერთმა ლიდერმა, თამარ ჩერგოლეიშვილმა სოციალურ ქსელში დაწერა, რომ რეჟიმთან მოლაპარაკებები ძალაუფლების გადაბარებაზე დაიწყება და ამ მოლაპარაკებების ინიციატორი ლელო არ იქნება. მისივე განმარტებით, "ამ დიალოგის ინიციატორი იქნება ქართველი ხალხი, რომელიც რეჟიმს სხვა გზას არ დაუტოვებს".

"რეჟიმთან მოლაპარაკებები აუცილებლად დაიწყება.

ოღონდ დაიწყება ძალაუფლების გადაბარებაზე და არა რეჟიმის გადარჩენაზე.

ლელო ნაღდად არ იქნება ამ დიალოგის ინიციატორი.

ამ დიალოგის ინიციატორი იქნება ქართველი ხალხი, რომელიც რეჟიმს სხვა გზას არ დაუტოვებს", — დაწერა ჩერგოლეიშვილმა.

კოალიცია ცვლილებისთვის ერთ-ერთმა ლიდერმა ნიკა გვარამიამ სოციალურ ქსელში დაწერა, რომ "შარლ-მიშელის სულის თეფშის ტრიალით გამოძახებას" აზრი არ აქვს.

"შარლ-მიშელის სულის თეფშის ტრიალით გამოძახებას შეეშვით, მეგობრებო, მაინც არ მოვა", — დაწერა გვარამიამ.

ერთიანი ნაციონალური მოძრაობის ერთ-ერთმა ლიდერმა ლიდერმა, ლევან სანიკიძემ ლელო — ძლიერი საქართველოს განცხადების საპასუხოდ დაწერა, რომ ისინი ჰააგის ტრიბუნალზე ქართული ოცნების მაშველი რგოლი არიან.

"ჰააგის ტრიბუნალის მღელვარე ტალღებში მოტივტივე ქოცების მაშველი რგოლი", — დაწერა სანიკიძემ.

შეგახსენებთ, ლელო — ძლიერმა საქართველომ განცხადება გაავრცელა, სადაც ოპოზიციურ პარტიებს ქართულ ოცნებასთან დიალოგისკენ მოუწოდა.