სასამართლომ ტროტუარზე დგომისთვის ბრალდებული საქართველოს ახალგაზრდა იურისტთა ასოციაციის (საია) იურისტი, გიორგი გოცირიძე სამართალდამრღვევად ცნო და სიტყვიერი გაფრთხილება მისცა — გადაწყვეტილება მოსამართლე დავით მაკარაძემ მიიღო.

"საქართველოს ახალგაზრდა იურისტთა ასოციაცია მიიჩნევს, რომ ადამიანის უფლებათა სამართლისგან სრულად დისტანცირებულია ის რეალობა, რომელშიც ტროტუარზე დგომის ფორმით გამოხატული მშვიდობიანი პროტესტისათვის ადამიანს სამართლებრივი პასუხისმგებლობა შეიძლება შეეფარდოს.

ასეთი რეგულირების მიღება და შინაგან საქმეთა სამინისტროს მიერ მისი აღსრულების მოთხოვნა არ შესაბამება ეროვნულ და საერთაშორისო სამართლებრივ სტანდარტებს და იგი ჩაგვრის, კონტროლის, შიშის გაღვივებაზე დამყარებული სამართალშემოქმედებისა და სამართალშეფარდების ინსტრუმენტია.

საქართველოს ახალგაზრდა იურისტთა ასოციაციის გუნდი ამ ტიპის საქმეებზე სტრატეგიული სამართალწარმოებას გააგრძელებს," — ვკითხულობთ საია-ს განცხადებაში.