არასამთავრობო ორგანიზაცია განცხადებას ავრცელებს.

რატომ არის მნიშვნელოვანი: 5 ივლისს რუსთაველის გამზირზე, სადაც ღირსების მარში იყო დაგეგმილი, პრორუსულმა ძალადობრივმა ჯგუფებმა და სასულიერო პირებმა დააორგანიზეს ძალადობა — აქტივისტების ოფისები დაარბიეს, ფიზიკურად გაუსწორდნენ 50-ზე მეტ ჟურნალისტს.

• ამ დრომდე დანაშაულის ორგანიზატორები არ დასჯილან და ახალ კანონსაწინააღმდეგო ქმედებებში მონაწილეობენ.
• საქალაქო სასამართლოს მიერ 4 აპრილს მიღებული გადაწყვეტილებით, 5 ივლისს დაკავებულ 6 პირს 5-5-წლიანი პატიმრობა ჰქონდათ შეფარდებული.
• დღეს, სააპელაციო სასამართლომ მსჯავრდებულები ჯგუფურ ძალადობაში გაამართლა და სასჯელი შეუმცირა.
• პროკურატურა სააპელაციოს გადაწყვეტილებას უზენაესში გაასაჩივრებს.

დეტალები: საიას შეფასებით, სააპელაციოს გადაწყვეტილება სიძულვილის ჯგუფების მიერ განხორციელებულ ძალადობაზე, დაუსჯელობის სინდრომის გაძლიერების კიდევ ერთ მაგალითია.

• მათივე თქმით, ამაში უპირველესი როლი შსს-ს და პროკურატურას მიუძღვით, როგორც გამოძიების წარმართვასა და ბრალის წარდგენაზე უფლებამოსილ ორგანოებს.
• "მნიშვნელოვანია, რომ თბილისის საქალაქო სასამართლომ ერთობლიობაში ზურაბ მახარაძისა და სხვა პირთა მხრიდან განხორციელებული ქმედება, მიუხედავად იმ გარემოებისა, რომ მათ წინააღმდეგ პროცესები არ მიმდინარეობდა, საჯარო წყაროებზე დაყრდნობით ორგანიზებულ დანაშაულებრივ ქმედებად შეაფასა", — ნათქვამია განცხადებაში.
• მათი განცხადებით, სასამართლომ საკითხის შეფასების დროს განსაკუთრებული ყურადღება გაამახვილა ონლაინ გამოცემა პუბლიკადან გამოთხოვილ ინფორმაციასა და ვიდეო ჩანაწერზე.
• საია ამბობს, რომ მტკიცებულებები ასახავს, თუ როგორ უნდა მოქცეულიყვნენ აქციის მონაწილეები 5 ივლისს, სტუდიაში მიმდინარეობს საუბარი 4 პირს შორის: ზურაბ მახარაძე, შოთა მარტინენკო, ირაკლი მარტინენკო და გიორგი ქარდავა.
• ორგანიზაციის განმარტებით, მიუხედავად იმისა, რომ პროკურატურა სააპელაციოს გადაწყვეტილების გასაჩივრებას აპირებს, უწყებას ძალადობაზე ხელს დაფარებაში ადანაშაულებს.

საიას განცხადებით, მახარაძის, შოთა და ირაკლი მარტინენკოსა და ქარდავას მიმართ დევნის დაწყებას არაერთხელ ითხოვდა, როგორც საჯაროდ, ასევე, პროკურატურასთან კორესპონდენციისას.

• მიუხედავად ამისა, ორგანიზაციის თქმით, დღემდე არც ერთი მათგანის მიმართ ბრალი წარდგენილი არ არის.
• საიას განმარტებით, სახალხო დამცველმა გენერალურ პროკურატურას 5 ივლისს ჯგუფური ძალადობის ორგანიზების ფაქტზე მიმართა, თუმცა უწყებამ წინადადება არ გაიზიარა.
• გარდა ამისა, ორგანიზაციის განმარტებით, პროკურატურის პოზიცია, რომ ის აპირებს განაჩენის გასაჩივრებას, მხარდაჭერილი უნდა იყოს იმ ფაქტითაც, რომ წარუდგინოს ბრალი დანაშაულის მთავარ ორგანიზატორებს.
• მათ შორის უნდა იყვნენ ზურაბ მახარაძე, შოთა მარტინენკო, ირაკლი მარტინენკო და გიორგი ქარდავა.
• საია განმარტავს, რომ წინააღმდეგ შემთხვევაში, აღნიშნული განცხადება არ ტოვებს თანმიმდევრულობის განცდას, გამოძიება კი ამ საქმეზე არაეფექტიანად მიმდინარეობს.