ინფორმაცია, რომელიც ჰოლანდიური თავდაცვის ანალიტიკისა და სამხედრო კვლევის ვებსაიტის, Oryx-ის მონაცემებს ეყრდნობა, Bloomberg-მა 15 იანვარს გამოაქვეყნა.

რატომ არის მნიშვნელოვანი: სრულმასშტაბიანი ომის დაწყების პირველივე დღეებიდან უკრაინა აქტიურად ითხოვს იარაღით დახმარებას.

• უკრაინელი მებრძოლების ძალისხმევასთან ერთად, ომში მყოფი ქვეყნის წარმატებული კონტრშეტევა და გაჭიანურებული "სპეციალური სამხედრო ოპერაცია" მნიშვნელოვნადაა დაკავშირებული პარტნიორების მიერ მიწოდებულ იარაღზეც.
• 14 იანვრის ვიდეომიმართვაში ვოლოდიმირ ზელენსკიმ თქვა, რომ რუსული ტერორის შეჩერება შესაძლებელია და ამისათვის საჭიროა იარაღი, რომელიც "პარტნიორების საწყობებშია".

დეტალები: Bloomberg განმარტავს, რომ მოცემული ციფრები მიახლოებითია, რადგან შეიძლება, შეიცავდეს იმ იარაღსაც, რომელსაც უკრაინას მოკავშირეები დაჰპირდნენ, თუმცა ჯერ არ გადაუციათ.

• ასევე, შესაძლოა, ჩამონათვალში ვერ მოხვდა ის იარაღი, რომელიც ომში მყოფმა ქვეყანამ უკვე მიიღო, მაგრამ ინფორმაცია ამის შესახებ არ გასაჯაროებულა.

ტანკები: საბჭოთა პერიოდის 410 ტანკი უკრაინას პოლონეთიდან, ჩეხეთიდან, სლოვენიიდან და სხვა პოსტსაბჭოთა ქვეყნებიდან გადაეცა;

• 14 იანვარს ბრიტანეთი უკრაინას დაჰპირდა Challenger 2-ის ტანკებს, რაც პირველი შემთხვევა იქნება, როდესაც დასავლური ქვეყანა უკრაინას მსგავსი ტიპის დახმარებას გაუწევს.
• გარდა ამისა, პოლონეთი უკრაინას გადასცემს გერმანული წარმოების Leopard 2-ის საბრძოლო ტანკებს, თუ ნატოს სხვა მოკავშირეები ანალოგიურ გადაწყვეტილებას მიიღებენ.
• უკრაინისთვის ტანკების გადაცემაზე გრძელდება დისკუსიები აშშ-სა და გერმანიაშიც.

ჯავშანტექნიკა/ქვეითი საბრძოლო მანქანები: 300 ერთეული, მათ შორის, 250 საბჭოთა წარმოების ქვეითი საბრძოლო მანქანა უკრაინამ პოსტსაბჭოთა ქვეყნებისგან მიიღო;

• საფრანგეთმა გასულ კვირას განაცხადა, რომ უკრაინას მიაწვდის დაუზუსტებელი რაოდენობის AMX-10RC ტანკის გამანადგურებლებს.
• შეერთებულმა შტატებმა და გერმანიამ განაცხადეს, რომ ისინი უკრაინას გადასცემენ 50 და 40 Bradley და Marder საბრძოლო მანქანებს.

ჯავშანტრანსპორტიორები: უკრაინამ უკვე მიიღო 1100 ერთეული, მათ შორის, 300 — M113 და 250 — M117 ჯავშანტრანსპორტიორი.

• ბლუმბერგი განმარტავს, რომ 160-ზე მეტი ამერიკული წარმოების M113 ჯავშანტრანსპორტიორი უკრაინას გადაეცა 7 ქვეყნიდან, მათ შორის დიდი ბრიტანეთიდან, ლიტვიდან, ავსტრალიიდან, გერმანიიდან, დანიიდან, პორტუგალიიდან და ესპანეთიდან.

ნაღმებისადმი რეზისტენტული (MRAP) მანქანები: უკრაინას გადაეცა 925, მათ შორის, 440 ამერიკული — M1224 MaxxPros, 90 ავსტრალიული — Bushmaster, რამდენიმე ბრიტანული Wolfhound-ები და Mastiff-ები.

• Bloomberg აღნიშნავს, რომ ეს მანქანები ჯავშანტექნიკის მსგავსია, მაგრამ სპეციალურად შექმნილია დახრილი კორპუსით, რათა დაიცვან ეკიპაჟი ნაღმებისა და თვითნაკეთი ასაფეთქებელი მოწყობილობებისგან.

მობილური ქვეითი მანქანები: ბლუმბერგის ცნობით, უკრაინისთვის გადაცემულია 1540-ზე მეტი, მათ შორის, 1250 ამერიკული წარმოების Humvee მაღალმობილური, მრავალფუნქციური მანქანა.

• ეს არის ბორბლიანი ჯავშანტრანსპორტიორები, რომლებიც სამხედროებს ბრძოლის ველზე თავდასხმის, დაზვერვისა და პატრულირების დროს გადააადგილებენ.

არტილერია: უკრაინამ მიიღო 300 ბუქსირებადი ჰაუბიცა, მათგან 210-ზე მეტი M777 და 72 ჰაუბიცა აშშ-დან.

• ასევე, 400-ზე მეტი თვითმავალი საარტილერიო მანქანა, საიდანაც 180 შეკვეთილია.

მრავალჯერადი სარაკეტო სისტემები: სულ 95 ერთეული, მათ შორის, 38 HIMARS სისტემა და 40-ზე მეტი 122 მმ-იანი საბჭოთა პერიოდის მრავალჯერადი სარაკეტო სისტემა პოლონეთიდან და ჩეხეთიდან.

საჰაერო თავდაცვის სისტემები: 37 გერმანული თვითმავალი საზენიტო სისტემა Gepard;

• 8 ამერიკული წარმოების NASAMS სარაკეტო ბატარეა;
• ერთი ამერიკული და ერთი გერმანული პატრიოტის სარაკეტო ბატარეა;
• 6 Strela-10Ms სარაკეტო სისტემა ჩეხეთიდან;
• ექვსი Stormer HVM დიდი ბრიტანეთიდან;
• რამდენიმე სხვა საზენიტო სარაკეტო სისტემა სლოვაკეთიდან, გერმანიიდან, ესპანეთიდან, საფრანგეთიდან და პოლონეთიდან.

თვითმფრინავები: ნატოს ქვეყნების მიერ ბულგარეთისგან შეძენილი 14 რუსული წარმოების სუ-25 სახმელეთო თვითმფრინავი;

• ოთხი სუ-25 ჩრდილოეთ მაკედონიიდან;
• 20 რუსული წარმოების Mi17 შვეულმფრენი აშშ-დან, რომელიც თავდაპირველად ავღანეთისთვის იყო განკუთვნილი;
• 11 საბჭოთა ვერტმფრენი ჩეხეთიდან, სლოვაკეთიდან და ლატვიიდან.
• სამი ბრიტანული Westland Sea Kings.
• ექვსი რუსული წარმოების Kamov ვერტმფრენი პორტუგალიიდან.
• 30-ზე მეტი Bayraktar TB2 დრონი თურქეთიდან, ასევე, თითო-თითო ლიეტუვიდან და პოლონეთიდან;
• ასობით ამერიკული Switchblade-ის მოძრავი საბრძოლო საბრძოლო სისტემა.
• 415 სადაზვერვო დრონი.

შორ მანძილზე მოქმედი რაკეტები: ბლუმბერგი ხაზს უსვამს, რომ არცერთი ქვეყანა ჯერ არ დასთანხმდა უკრაინისთვის ATACMS შორ მანძილზე მოქმედი სარაკეტო სისტემების მიწოდებას, რომლებსაც შეუძლიათ სამიზნეების განადგურება HIMARS-ზე მნიშვნელოვნად დიდ მანძილზე.

• პარტნიორები ფიქრობენ, რომ ამან შეიძლება მოსკოვთან პირდაპირი დაპირისპირება გამოიწვიოს.

სხვა იარაღი: უკრაინას, ასევე, მიეწოდა რაკეტები, რომლებიც შეიძლება, გამოყენებულ იქნას მტრის რადარების, გემების, ზედაპირული სამიზნეების, უპილოტო წყალსატევების, სარადარო აღჭურვილობისა და სხვა სისტემების წინააღმდეგ.