ბავშვობისა და თინეიჯერობის წლები თავიანთი სილაღითა და მხიარულებით უამრავ ადამიანს ლამაზად ახსენებს თავს, მიუხედავად იმისა, რომ ხშირად გვიწევდა ხვეწნა-მუდარა მეგობრებთან ერთად გასართობად გაშვებაზე თუ დაბალი ნიშნის ან სხვა ონავრობის გამო დასჯის თავიდან აცილებაზე. მართალია, ყველა ჩვენგანს განსხვავებული მოგონებები და გამოცდილებები აქვს, მაგრამ ეს ათი ფრაზა ალბათ ერთხელ მაინც აუცილებლად გვითქვამს ყველას ჩვენი მშობლებისთვის.

თუ უკვე წაიკითხე დედების საყვარელი ფრაზები, დროა, ამ ფრაზებსაც გადახედო.

1. თუ გიყვარვარ, რა!

"თუ გიყვარვარ", ანუ მშობლის ნამუსზე აგდების საუკეთესო გზა. ამ ჯადოსნური სიტყვების წარმოთქმის შემდეგ, თუკი სურვილს მაინც არ შეგისრულებენ, სინდისის ქენჯნის დასაძლევად რაღაცით აუცილებლად დაგასაჩუქრებენ. ამაზეა ნათქვამი, მთვარეს დაუმიზნე და რომც ააცდინო, მაინც ვარსკვლავებს შორის აღმოჩნდებიო.

2. რაღაცას გეტყვი და არ მეჩხუბო!

როცა იცი, რომ რაღაც ძალიან მიქარე და ვერც მიჩქმალავ და ვერც გაამართლებ, ამიტომ მშობლების გულმოწყალების იმედიღა დაგრჩა. "მითხარი, არ გეჩხუბები" კი უკვე იცი, რომ ერთი დიდი ტყუილია და, რაღა დაგიმალო, ალბათ ვერც ამ შემთხვევაში აიცდენ გვარიან დატუქსვას.

3. წავალ რა, გთხოვ!

გაშვება? არ გაშვება? საკითხავი აი ეს არის. თინეიჯერობის ყველა დღე, თვე და წელი სწორედ ამ ფრიად საჭირბოროტო საკითხის ირგვლივ ბრუნავს.

4. მალე მოვალ!

რა ფუჭიცაა ეს პირობა ალბათ კარგად იცი, მაგრამ შენიც გვესმის, ასეთი თეთრი, ქათქათა ტყუილები საჭიროა, თუ გინდა, რომ მარტო მათემატიკის დავალებები კი არა, სოციალური ცხოვრებაც გქონდეს.

5. აუ, სადაა? ვერ ვპოულობ!

ამ დროს დედა აუცილებლად შეგახსენებს, რომ თვალების წესიერად გახელა არ იცი, თუმცა წამიერად გიპოვის იმ ნივთს, რასაც შესაძლოა მთელი დღე ეძებდი. აი, დედამაც თუ ვერ იპოვა, მაშინ კი მართლა დაკარგულია.

6. საჭმელად რა გვაქვს?

რა მიხვედრა უნდა, ალბათ რომელიღაც ჯანსაღი სუპი ყველა სახეობის მწვანილით, რომლის ატანაც არ გაქვს! მშობლები ხომ სწრაფი კვების პროდუქტებს დიდად არ სწყალობენ და მაინცდამაინც წვნიანზე და ბოსტნეულზე გიჟდებიან.

7. მაჭამე რა რამე!

არადა, რომ გკითხონ, არავის ჭკუის სწავლება და დახმარება არ გჭირდება...სანამ არ მოგშივდება...

8. ესეც მიყიდე რა!

ამ დროს ალბათ შეგახსენებენ, რომ ფული ხეებს არ ასხია და შესაძლოა, შენს და-ძმებსაც ბევრი რამ უნდათ და სჭირდებათ. სწორედ ამ დროს უნდა მოიხმო "თუ გიყვარვარ" მხსნელად და მაშველად და რაღაცას მაინც გიყიდიან.

9. რა ჩავიცვა?

როცა სულ იმას ედავები მშობლებს, რომ გიკონტროლებენ, რა ჩაიცვა და რა — არა, თუმცა საქმე საქმეზე რომ მიდგება და დილით სადღაც გაგვიანდება, გაქაფულ სირბილსა და ტანსაცმლის ქექვაში, მაინც მათი რჩევა გჭირდება.

10. სულ თქვენს ჭკუაზე გინდათ, ვიარო!

ცდები, მეგობარო, ის კი არ უნდათ, რომ მათ ჭკუაზე იარო, არამედ ირბინო, იხტუნაო და ბოლოს ალბათ იფრინო კიდეც.