ალბათ მსოფლიოს ნებისმიერ დედას უნდა, რომ თავისი შვილი ვარსკვლავთმწყვეტელი, მთათგადამდგმელი, მწერვალთმპყრობელი და მზისდამთრგუნველი გაიზარდოს. გამონაკლისი არც ქართველი დედები არიან. ბევრი მათგანი დედობას პროფესიადაც კი განიხილავს, შვილის ყოველ პატარა წაბორძიკებას კი — საკუთარ რეპუტაციაზე უზარმაზარ ლაქად. თითოეული ქვემოთ ჩამოთვლილი შეგონებებიდან, რომლის ნახევარი მაინც ალბათ შილიფად ჩაცმული მუქარა ანდა საყვედურია, მათი რწმენით, ისევ შვილის კეთილდღეობას ემსახურება და ეს "სპარტანული წვრთნაც" ფიქრობენ, იმისთვისაა საჭირო, რომ საუკეთესოზე საუკეთესოები გავხდეთ.

ახლა კი, დიდი შესავლების გარეშე, წარმოგიდგენთ ქართველი დედების 20 საყვარელ ფრაზას:

1. არა, იყოს, არ შია!

როცა დედასთან ერთად სტუმრად ხარ წასული და მასპინძლები ისეთ გემრიელობებს გთავაზობენ, გული მიგდის, დორბლი მოგდის, მაგრამ რატომღაც დედას ჰგონია, თუკი ვინმეს მშიერი ეგონები, მის რეპუტაციას მიადგება ჩრდილი, ამიტომ ყველას არწმუნებს, გრამი რომ გრამია, ისიც ვეღარ ჩაგივა მუცელში.

2. ამ სახლში ყველას მოახლედ ვუნდივარ!

როცა ოჯახში აბსოლუტურად ყველა სთხოვთ, ცოტა დაისვენოს, თუმცა თვითონ ვერ ჩერდება, დილიდან საღამომდე ჯარასავით ტრიალებს და თან ჩხუბობს, რომ ყველას მოახლე და მონაა და თაგვების დაუძინებელი მტერი რომ არ იყოს, ალბათ კონკიაც იქნებოდა ყველაფერთან ერთად.

3. რომ მოვკვდები, დაისვენებთ!

წინდაწინ კუბოში ჩახტომა ანუ მრავალგზის დატესტილი გზა შვილების ნამუსზე ასაგდებად. ალბათ ყველა დედამ იცის, თავის მომკვდარუნება საუკეთესო გზაა, თავის ჭკუაზე გაატაროს მთელი ოჯახი.

4. მოვკვდები და დავისვენებ!

ასე, ალტერნატიულად ასვენებენ ხან შვილებს და ხან თავიანთ თავს. შედეგი იგივე — დედა იგებს!

5. ოთახია თუ უღრანი ტყე!

როცა შენი ოთახი არასდროსაა მისთვის საკმარისად სუფთა და მოწესრიგებული და გაუთავებლად ბუზღუნებს, ვითომ ეშინია, საიდანმე ბუ ან ხვლიკი არ გამოუხტეს.

6. მანდ არ მომიყვანო, იცოდე!

როცა არგუმენტებში იმდენად უგებ, რომ უკვე ფიზიკური საფრთხე გემუქრება და ხვდები, მაგარს აირტყამ, თუ არ მოკურცხლე.

7. დამაცადე, მოგივლი მე შენ!

სავარაუდოდ, საჯარო ადგილას ხართ და ანგარიშსწორებისთვის სახლში მისვლამდე მოცდა უწევს. რამით მოთაფლე ან სასწრაფოდ მამასთან გადარეკე.

8. გამომტყუებ შენ მე რაღაცას!

არც აქ გაქვს კარგად საქმე, მეგობარო. დროულად მოინანიე, გირჩევ.

9. იმან როგორ უნდა გაჯობოს, მითხარი!

აქ ალბათ რომელიმე მეზობლის ბავშვმა ტესტში შემთხვევით შენზე მაღალი ქულა აიღო და დედასთან ერთად სრულიად ოჯახიც განცვიფრებულია, ასეთი გენეტიკის მქონეზე ყოჩაღი ვიღაცა თინიკოს უტვინო ბღარი როგორ შეიძლება, გამოდგეს.

10. ბევრს ნუ ტლიკინებ!

როცა რაღაცაზე შენი აზრი გამოთქვი, თუმცა როგორღაც დედას ვერ ეპიტნავა და გადაწყვიტა, დროა, ენას კბილი დააჭირო. მაშინაც კი, თუ სტუმრად მოსული ნათესავები "სტალინის დახვეწილ ულვაშსა და რკინის მუშტს" აქებენ გაცხარებით. აბა, უფროსებთან კამათი ვის გაუგია!

11. ყველა რომ ხიდიდან გადახტეს, შენც უნდა გადახტე?!

აბა, უპასუხე, თუ მაგარი ხარ! დედების და პედაგოგების მიერ ერთხმად აღიარებულ ამ რკინის ლოგიკას მაინც ვერ მოერევი.

12. სულ გამოშტერდა თქვენი თაობა! ჩემ დროს...

დედები აქაც ძალიან ჰგვავან მასწავლებლებს და დაუზარებლად გვახსენებენ, რომ მათი დროის სამოსანი ჩვენი დროის ფრიადოსანს ჯიბეში ჩაისვამს და აღარც გამოუშვებს.

13. ამ ბავშვს პატრონი არ ჰყავს?!

როცა დედა ფიქრობს, რომ ა-ს გოგომ ან ბ-ს ბიჭმა რაღაც ძალიან აიშვა და დროა, პატრონებმა საყელური გაუკეთონ და ცოტა დააოკონ.

14. სულ ხელიდან წავიდა ეს ხალხი!

ალბათ მეზობელი ნანულას გოგო ახლა სხვა მანქანით მოიყვანეს ღამე სახლში და ყველას მაგივრად დედათქვენმა იუკადრისა.

15. ვის გაუგია ამდენი ძილი?!

როცა ძალიან გიყვარს ძილი, დედაშენისთვის კი დილის 7 საათი უკვე შუადღეა და ეშინია, რამე ხომ არ გჭირს შემთხვევით.

16. სად მიბრძანდები ასე ჩაცმული?!

ჩართე სიყვარული ყველას უნდა და მიბაძე ყარაულაშვილ ქეთოს, თუკი ნამუსი შეგრჩა!

17. ადექი დროზე, დაგაგვიანდა!

როცა სთხოვე, ასე შვიდზე გაეღვიძებინე, ის კი დილის ექვსზე გაღვიძებს და გეუბნება, რომ უკვე ცხრა გახდა და ათი დაიწყო.

18. არ დააღამო! დროზე მოდი!

იჩქარე! წამზომი ჩაირთო!

19. ვის წერ ასეთი გაბრწყინებული?!

მაინც გაარკვევს, მეგობარო, ასე რომ, უთხარი!

20. აი, შენც გახდები დედა და დაინახავ!

ეს კი სულ სულ ბოლო ტუზი კოზირი, რომელიც როგორ გინდა, რომ მოჯოკრო.

პ.ს. აქვე, უხმო, თუმცა ყველა ხმამაღალ სიგნალზე უფრო საშიშ სიგნალთა განმარტებანი:

• წარბების აწევა — დაეტიე შენს ადგილზე!
• ტუჩების მოკუმვა — მიგიყვანო ჯერ სახლში!
• თვალების ბრიალი — გასაცლელი გაქვს თმები!