ზღაპრული დღეების დადგომამდე სულ ცოტა დრო რჩება. ეს წლის საუკეთესო პერიოდია, როცა ზამთრის დღესასწაულის მოლოდინი ყველგან იგრძნობა: მაღაზიების ვიტრინებში, ათასფერად განათებულ ქუჩებში, სკვერებსა და სახლებში.

დეკემბრის დადგომასთან ერთად თავში მხოლოდ ერთი აზრი მიტრიალებს ხოლმე: როგორი ფერებით გავაწყო ნაძვის ხე, რა სიახლე შევიტანო საახალწლო დეკორაციებში, როგორ გავალამაზო სახლი თუ სამუშაო სივრცე, როდის შევადგინო საჩუქრების სია და შევუდგე საქმეს.

ტრადიციულად, ყოველ წელს ეს პერიოდი განსაკუთრებულად დატვირთულია როგორც ოჯახებში, ისე სამსახურებში — ყველას თავის წილი საქმე აქვს და გულმოდგინედ ასრულებს მას. თუმცა, ამ სამზადისში ერთი რამ ყველას აერთიანებს — ფიქრი იმაზე, რომ ყველაფერი ცუდი და უსიამოვნო ძველ წელში დატოვონ და იმედიანად, საუკეთესოს მოლოდინით შეხვდნენ ახალს.

ამ საახალწლოდ, ისევე როგორც 2021-ში და 2019-ში, საზეიმო ფუსფუსში ჩართული რამდენიმე ქართული კომპანია შევარჩიე და თქვენც გაგიზიარებთ, თუ როგორ ემზადებიან ისინი ახალი წლისთვის, გიამბობთ, ვინ არის ამა თუ იმ კომპანიის მთავარი "ელფი" და რა ტრადიციებს მისდევენ ისინი ყოველწლიურად.

თიბისი

მარჯანიშვილის ისტორიულ ქუჩაზე, თიბისი კონცეპტის მულტიფუნქციური სივრცის საახალწლო ფასადი უკვე განათდა. საზეიმო დეკორაციაზე კომპანიამ — Light Studio-მ იმუშავა. რა გასაკვირია, რომ ეს გასაოცარი საახალწლო მორთულობა, მომხმარებლების გარდა, გამვლელების ყურადღებას მუდმივად იქცევს.

PSP

PSP-ში წინასაახალწლო მზადება ზაფხულის ბოლოდან იწყება, რაშიც ყველაზე მეტად მარკეტინგისა და HR სამსახურებია ჩართული. კომპანიაში ყოველ წელს განსხვავებული განწყობითა და თემატიკით ხვდებიან. ასე მაგალითად, თუ წინა წლებში ნახატები გადმოსცემდა საახალწლო ჯადოსნობის ხიბლს, წლევანდელი ახალი წლის კონცეფცია "ყველაზე მზრუნველის" კამპანიის გაგრძელებაა და ოფისის ფასადიც შესაბამისად არის მორთული.

დაარსების დროიდან, 90-იანი წლებიდან, PSP-ში ტრადიციად აქვთ ძველით ახალ წელს ერთად შეხვედრა. ამ დღეს კომპანიისგან საჩუქარს იღებს ყველა, მიუხედავად იმისა, რომ გუნდი მუდმივად იზრდება და იგი 5000 თანამშრომლისგან შედგება.

არქი

არქისთვის საახალწლო პერიოდი განსაკუთრებით ჯადოსნურია. არქი ერთი დიდი ოჯახია, რომელიც დღეს 25 000-ზე მეტ წევრს აერთიანებს. საახალწლო სამზადისს კი არც მეტი, არც ნაკლები, აგვისტოდან იწყებენ. ფიქრის პროცესში მთელი გუნდია ჩართული, განიხილავენ, თუ რით შეიძლება გაახარონ "არქელები". გუნდის წევრები, ტრადიციულად, ყოველ წელს ყველა საცხოვრებელ სახლს სტუმრობენ და "არქელებს" საახალწლო საჩუქრებს გადასცემენ.

კლიპარტი

კლიპარტის თანამშრომლები, დატვირთული გრაფიკის გამო, ოფისს ახალი წლის დადგომამდე რამდენიმე დღით ადრე რთავენ. როგორც წესი, პროცესს გუნდის ცალკეული წევრები იწყებენ და გრაფიკის შესაბამისად, მასში, ეტაპობრივად, სხვებიც ერთვებიან. საბოლოოდ კი სამზადისში ყველა იღებს მონაწილეობას.

2023 წლისთვის კლიპარტი კიდევ უფრო მეტად გაზრდას და განვითარებას გეგმავს. ამასთან, კომპანიაში იმედოვნებენ, რომ მომდევნო წლის განმავლობაში სარეკლამო ინდუსტრიაც მნიშვნელოვნად წაიწევს წინ.

ისთ ფოინთი

ისთ ფოინთში საახალწლო ფუსფუსი და დიდი სამზადისი დეკემბრის პირველი რიცხვებიდანვე იწყება. ამ სამზადისის კულმინაცია მთავარ მოედანზე დიდი ნაძვის ხის ანთებაა, რომელშიც ყველა თანამშრომელია ჩართული.

წელს თბილისის ბავშვთა კაპელას საშობაო სიმღერის და სანტების მსვლელობის ფონზე აბდღვრიალდა ნაძვის ხე და ისთ ფოინთიც საახალწლო ქალაქად გადაიქცა. ნაძვის ხის ანთების გარდა, ისთ ფოინთში მთელი დეკემბრის განმავლობაში ბავშვებს უამრავი საჩუქარი, მხიარულება, თამაში და ექსპერიმენტორიუმის ჯადოსნური შოუ ელოდებათ, სადაც დასწრება ყველასთვის თავისუფალია.

ისთ ფოინთში ახალი წლის მოახლოებას თანამშრომლები განსაკუთრებულად და დიდი ცნობისმოყვარეობით ელოდებიან, რადგან აქაური საახალწლო ტრადიციის თანახმად, ყოველწლიურად, თემატური ღონისძიებებიც იგეგმება. წლევანდელი წვეულების თემატიკა მშვიდობა და ჰიპების სუბკულტურა იყო, საუკეთესო კოსტიუმის ავტორებს კი განსაკუთრებული საჩუქრები გადაეცათ.

მეამა

მეამას სათავო ოფისის საახალწლო კონცეფციასა და დიზაინზე ფიქრს ახალ წლამდე რამდენიმე თვით ადრე იწყებენ. შენობის წლევანდელი გაფორმების იდეა მეამას თანამშრომლებს ეკუთვნით, სამუშაოების სპეციფიკიდან გამომდინარე კი, პროცესში სპეციალისტების გუნდიც ჩაერთო.

განსაკუთრებული შეთავაზებები მეამას სივრცეებში, ასევე ონლაინ მაღაზიაში და მათი გაყიდვების არხებში უკვე ჩაშვებულია, ასე რომ, მომხმარებლებს უკვე შეუძლიათ, შეარჩიონ მათთვის სასურველი პროდუქტი. 2023 წელს კი მეამა ბევრ ახალ და საინტერესო პროექტს გეგმავს.

ბილაინი

ბილაინში წინასაახალწლო სამზადისს HR გუნდი უძღვება, თუმცა ამ საქმეში მთელი კომპანია დიდი გულმოდგინებითაა ჩართული — მაღაზიების თანამშრომლები, როგორც თბილისში, ასევე რეგიონებში, ოფისების მორთვაში მონაწილეობენ. ისინი მზადებას ნოემბრიდან იწყებენ.

ბილაინში ოფისების მორთვის პროცესი, დაახლოებით, ორი კვირის განმავლობაში გრძელდება. ყოველდღე რაღაც ახალი დეტალი ემატება დეკორაციას, შესაბამისად, სიხარულიც და მოახლოებული დღესასწაულით აღტაცებაც თანამშრომლებს ყოველდღიურად უახლდებათ.

წელსაც, როგორც ადრე, ბილაინის მომხმარებლებს საშუალება ექნებათ განსაკუთრებული საახალწლო შეთავაზებებით და აქციებით ისარგებლონ. უფრო საინტერესო ამბები კი უკვე 2023-ში ელით. ბილაინი გვპირდება, რომ მრავალმხრივ გამორჩეული იქნება მომავალი წელი მათთვის. ამას კი პირველები, ტრადიციულად, თანამშრომლები და მომხმარებლები შეიტყობენ.

ალტე უნივერსიტეტი

ალტეში სჯერათ, რომ დღესასწაული ერთობას მოჰყავს. ერთობასა და საახალწლო სიმღერების ღიღინსაც... ამიტომ წელს კამპუსის ყოველ სართულზე განწყობის შესანარჩუნებლად (შუალედური გამოცდების მიუხედავად), სტუდენტებისთვის საშობაო მელოდიები გააჟღერეს, ხოლო პოსტერებზე ასაკვიატებელ ფრაზებთან ერთად QR კოდებიც დაიტანეს. რაც შეეხება დეკორაციებს, ბუხარი არ აქვთ, მაგრამ, მაინც სანტასავით შეიპარნენ უნივერსიტეტში მაშინ მორთეს იქაურობა, როცა შიგნით არავინ იყო. ბოლო შტრიხები ნაძვის ხეზე კი სტუდენტებთან ერთად შეიტანეს.

ჯიპიაი ჰოლდინგი

ჯიპიაიში ფიქრი საახალწლო განწყობის შექმნაზე, ოფისის გალამაზებაზე, თანამშრომლების გახალისებასა და კლიენტებისთვის განსაკუთრებული შეთავაზებების მოფიქრებაზე ნოემბრის ბოლოდან იწყება. როგორც წესი, სამუშაო გარემოს სადღესასწაულოდ მორთვაში სხვადასხვა რგოლის მენეჯერები მონაწილეობენ. ისინი თანამშრომლებისთვის სიურპრიზის მოწყობას ცდილობენ, რათა რომელიმე ორშაბათ დილას, სამსახურში მოსულებს ჯადოსნური და ამაღლებული გარემო დაახვედრონ. მათ წელს, პანდემიური 2-წლიანი პაუზის შემდეგ, პირველად მოახერხეს ახალი სამუშაო სივრცეების სადღესასწაულოდ მორთვა.

ოფისში Secret Santa-ს გათამაშება ალბათ ყველა გუნდის ტრადიციაა, რომელსაც ჯიპიაიშიც ხალისით ინარჩუნებენ. უზარმაზარი გუნდის წევრებს ეს შესაძლებლობას აძლევს, კიდევ უფრო ახლოს გაიცნონ ერთმანეთი, იფიქრონ ერთმანეთის გახარებასა და ზრუნვაზე.

წლის ბოლო ხომ ყველასთვის გასული თვეების შეჯამების, მიღწევების აღიარებისა და შეცდომების გააზრების დროა. კომპანიაშიც ემზადებიან ამისთვის და საახალწლო დღეებში, ან წლის შემაჯამებელ წვეულებაზე აჯილდოებენ საუკეთესო შედეგებისა და განსაკუთრებული მიღწევების მქონე თანამშრომლებს.

ჯიპიაიში იმედოვნებენ, რომ ეს წელი მნიშვნელოვანი ზრდის და ისეთი ბაზრების თუ სეგმენტების ათვისების წელი იქნება, რომელთაც განვითარების მაღალი პოტენციალი აქვთ.

დომინო

დომინოს გუნდის წევრები საახალწლოდ ოფისებს არა მარტო თავისივე პროდუქციით, არამედ ხელნაკეთი დეკორითა და გირლანდებითაც რთავენ. მაღაზიის თანამშრომლები თითოეულ სექციას თემატურად აწყობენ — ნაძვის ხეებიც კი სულ სხვადასხვანაირია. გამოაქვთ საახალწლო პროდუქცია, ეწყობა სადღესასწაულო დახლები, ე.წ. საშობაო სოფლები, სადაც ყველაფერია, რაც ამ პერიოდში სახლის მოსართავად დაგჭირდებათ.

·2023 წლიდან დომინო ელოდება გაფართოებას, მეტ კმაყოფილ და ბედნიერ მომხმარებელს. მიზნად კი ისახავს მომხმარებლისთვის უფრო მაღალი ხარისხის სერვისის შეთავაზებას და პროდუქციის უფრო გამრავალფეროვნებას.

ტერაბანკი

ტერაბანკში ახალი წლის სამზადისი სექტემბრიდან იწყება. ამ საქმეში მთელი ბანკი ჩართულია, მაგრამ ყველაზე მეტი ფუსფუსით მარკეტინგისა და HR-ის გუნდები გამოირჩევიან. სექტემბრიდანვე იწყება კლიენტებისა და პარტნიორებისთვის საჩუქრების შერჩევა, საახალწლო დეკორაციების თემატიკაზე ფიქრი და კორპორაციული ღონისძიების დაგეგმვა. რაც მთავარია, საახალწლო კამპანიები მომხმარებლებისთვისაც ეწყობა — წელს ამის მაგალითია ქარავანი ორბელიანზე, რომლის გენერალური სპონსორიც ტერაბანკია.

ტერაბანკში ახალი წლიდან გეგმავენ, უფრო კარგად გააცნონ და დაამახსოვრონ თავი მომხმარებლებს. ბრენდის გაძლიერებასთან ერთად, იმედი აქვთ, საზოგადოებას ბევრ საინტერესო აქტივობასა და კამპანიას შესთავაზებენ.

ალდაგი

ზამთრის მოახლოებასთან ერთად, ალდაგი სადღესასწაულო სამზადისს იწყებს. ისინი ცდილობენ, ყოველი ახალი წელი წინა წლისგან განსხვავებული იყოს, ყურადღებას აქცევენ ყველა დეტალს, დიდ ენერგიასა და ძალისხმევას დებენ იმაში, რომ თანამშრომლებს ოჯახური და თბილი საახალწლო გარემო შეუქმნან.

ალდაგი ყოველთვის ცდილობს მომხმარებლების განებივრებას სხვადასხვა საჩუქრითა თუ აქტივობით. წელს, ზამთრის კამპანიის ფარგლებში, ალდაგის მომხმარებლებს შესაძლებლობა აქვთ, განსაკუთრებული შეთავაზებებით ისარგებლონ. კომპანიაში დიდი სურვილი აქვთ, 2023 წელს გასული წლის შედეგები გააუმჯობესონ, ამიტომაც გეგმავენ და ელიან ბევრ წარმატებულ პროექტს და რაც მთავარია — კიდევ უფრო მეტ დაზღვეულს!

m²

საახალწლო მზადება m²-ში ახალ წლის დადგომამდე რამდენიმე თვით ადრე იწყება და მასში კომპანია სრული შემადგენლობით ერთვება. ეს პროცესი საახალწლო კამპანიების დაგეგმვით იღებს სტარტს. თანამშრომლები ზრუნავენ, რომ ყველა საცხოვრებელი კომპლექსი და გაყიდვების ოფისები განსაკუთრებულად იყოს მორთული.

2023 წელს კომპანია ბრენდის ახალი პლატფორმით და გზავნილით ხვდება. 15 წელია, m² მომხმარებელს უკეთეს ცხოვრებას ჰპირდება, დღეს კი მათი ახალი გზავნილი ასე ჟღერს – "იცხოვრე შენი ცხოვრებით".

m²-ის გუნდი ტრადიციულად იღებს მონაწილეობას ქალაქში საერთო სადღესასწაულო განწყობის შექმნაშიც. წელს მათ ტარას შევჩენკოს სახელობის სკვერი მორთეს, რომელიც ნებისმიერი გამვლელის ყურადღებას იქცევს. როგორც კომპანიაში ამბობენ, ტრადიციულად, საახალწლოდ ირთვება საცხოვრებელი და სამუშაო სივრცეებიც და იგეგმება სპეციალური, წინასაახალწლო აქციები, რომლებიც სახლის ყიდვის უკეთეს შესაძლებლობას ან საინტერესო ბენეფიტს აძლევს კლიენტს. წელს საახალწლოდ კომპანიამ მომხმარებლებს ფასდაკლებები და საჩუქრებიც მოუმზადა.

"2023 წლისგან სტაბილურობას ველოდებით. ჩვენ კი ვქმნით ისეთ გარემოსა და სივრცეებს, სადაც ადამიანები შეძლებენ, იცხოვრონ საკუთარი განსაკუთრებული ცხოვრებით, მეტი დრო დაუთმონ საკუთარ თავს და სურვილებს, — აღნიშნავენ კომპანიაში.

დაბოლოს — On.ge

სიის დასასრულს ჩვენს პატარა, თუმცა დიდი ზეიმისა და ჟრიამულის ფონზე მორთულ ნაძვის ხესაც გიჩვენებთ. მიუხედავად იმისა, რომ თანამშრომლების დიდი ნაწილი კვლავ დისტანციურ მუშაობის მოდელზეა, ინტერიერი დეკემბრის დასაწყისიდანვე მოვრთეთ მათთვის, ვინც ოფისის კედლებიდან ყველაზე მნიშვნელოვან სიახლეებს მილიონობით მკითხველს აცნობს.

On.ge-ში გვჯერა, რომ 2023 წელი ჩვენთვის, ისევე, როგორც ჩვენი ერთგული პარტნიორებისთვის ზრდისა და განვითარების წელი იქნება. გპირდებით კიდევ უფრო მეტ სტატიას, ქვიზს, საინტერესო ვიდეოს თუ პოდკასტს.

On.ge გილოცავთ დამდეგ შობა-ახალ წელს!