ინფორმაციას ამის შესახებ საერთაშორისო მედიები ავრცელებენ.

რატომ არის მნიშვნელოვანი: ომის დაწყების შემდეგ ზელენსკის ქვეყანა არ დაუტოვებია.

  • ეს მისი პირველი ოფიციალური ვიზიტი იქნება საომარი მდგომარეობისას.

დეტალები: AXIOS წყაროზე დაყრდნობით წერს, რომ კაპიტოლ ჰილი კონგრესის ერთობლივ სესიაზე უკრაინის პრეზიდენტის მასპინძლობისთვის ემზადება.

  • მაღალი რანგის წარმომადგენელმა გამოცემას განუცხადა, რომ დეტალები ჯერ არ არის ბოლომდე შეთანხმებული, მაგრამ კაპიტოლიუმის პოლიცია აძლიერებს უსაფრთხოების საკითხს ოთხშაბათის პოტენციური ვიზიტისთვის.
  • მათივე ინფორმაციით, პალატის სპიკერმა, ნენსი პელოსმა კოლეგებს მიწერა და სთხოვა, ოთხშაბათის სხდომას დასწრებოდნენ.
  • CNN-ს ორი ინფორმირებული წყარო უამბობს, რომ პრეზიდენტი ჯო ბაიდენი და ზელენსკი ოთხშაბათს თეთრ სახლში შეხვედრას გეგმავენ.
  • მათივე ინფორმაციით, თეთრი სახლი ამ საკითხზე კომენტარს არ აკეთებს.
  • THE HILL კი აღნიშნავს, რომ ზელენსკის ვიზიტზე ინფორმაცია მათ სენატის თანაშემწემ დაუდასტურა.

გარდა ამისა, დღეს უკრაინის პრეზიდენტი ბახმუტში იმყოფებოდა, საიდანაც უკრაინელი მებრძოლების ხელმოწერილი დროშა წამოიღო.

  • ზელენსკიმ საღამოს ვიდეომიმართვაში განაცხადა, რომ ჯარისკაცებმა სთხოვეს, მიეცა დროშა მათთვის, ვისი გადაწყვეტილებებიც ძალიან მნიშვნელოვანია უკრაინისთვის.
  • სახელმწიფო მედია უკრინფორმი წერს, რომ ბახმუტის მცველებმა ზელენსკის მისცეს დროშა აშშ-ის კონგრესისთვის.