საქართველოს პარლამენტის თავმჯდომარე მოშიმშილეებს ესაუბრა.

რატომ არის მნიშვნელოვანი: 14 დეკემბერს, მას შემდეგ, რაც ექსპრეზიდენტი საკუთარ სასამართლო პროცესზე არ ჩართეს და მიზეზად ტექნიკური პირობების არარსებობა დაასახელეს, პენიტენციურმა სამსახურმა დამონტაჟებული კადრები გაასაჯაროვა, რომელიც კლინიკა ვივამედში, მიხეილ სააკაშვილის პალატაშია გადაღებული.

  • კადრები აგვისტოდან დეკემბრის ჩათვლით თარიღდება და უხმოდ და უკონტექსტოდ არის შეკრული. 10-წუთიანი ვიდეოდან ბოლო პერიოდის კადრებს, რომლებიც სააკაშვილის ახლანდელ მდგომარეობას ასახავს, ყველაზე ნაკლები დრო, 19 წამი ეთმობა. ნაწილზე კი თარიღი საერთოდ არ ჩანს.
  • ვიდეომასალის გამოქვეყნებას წინ უძღოდა იუსტიციის მინისტრის, რატი ბრეგაძის მუქარა, რომ, თუ "სიმულაციური ქმედებები" არ შეწყდებოდა, გაასაჯაროებდნენ მტკიცებულებებს.
  • ერთიანი ნაციონალური მოძრაობის სამმა წევრმა გუშინ შიმშილობა მიხეილ სააკაშვილის ჯანმრთელობის გადასარჩენად დაიწყო, დღეს მათ კიდევ ერთი წევრი შეუერთდა.

დეტალები: შალვა პაპუაშვილი ამბობს, რომ შიმშილობა არა არის ის ხერხი, რომლითაც უნდა ხდებოდეს სახელმწიფოს იძულება გადაწყვეტილების მიღების პროცესში.

  • "მოვუწოდე მათ, შეწყვიტონ შიმშილობა. საქართველო არის სამართლებრივი სახელმწიფო, ყველა საკითხი წყდება სამართლებრივი პროცედურების მეშვეობით და აქ მოწოდება, იძულება, შანტაჟი, მით უმეტეს, საკუთარი ჯანმრთელობის ფასად, არის მიუღებელი", — განაცხადა პაპუაშვილმა.
  • მისი თქმით, ასეთი საქციელი, საბოლოო ჯამში, ახალისებს მიხეილ სააკაშვილს, რომ მან უფრო მეტად არ ითანამშრომლოს სასჯელაღსრულების სისტემასა და ექიმებთან.