ღამით, ლონდონში, მოქალაქეებზე რამდენიმე თავდასხმა განხორციელდა.

პირველი შემთხვევა ლონდონის ხიდზე ლონდონის დროით 22:15 სთ.-ზე მოხდა, როდესაც მანქანა რამდენიმე მოქალაქეს დაეჯახა. პოლიციის ინფორმაციით, რამდენიმე ადამიანი დაიღუპა, თუმცა ზუსტი რიცხვი ჯერ-ჯერობით არ სახელდება.

ცოტა ხნის შემდეგ სხვა ინციდენტი მოხდა ახლომდებარე სავაჭრო უბან ბორო მარკეტში. როგორც თვითმხილველები აცხადებენ, მათ დაინახეს ადამიანი, რომელიც დანით იყო შეიარაღებული და რამდენიმე ადამიანი დაჭრა.

ორივე ინციდენტს უკვე მიენიჭა ტერორისტული აქტის კვალიფიკაცია.

ტერორისტულ აქტს უკვე გამოეხმაურა აშშ-ს პრეზიდენტი დონალდ ტრამპი:

"ამერიკას რაც შეეძლება ლონდონისა და გაერთიანებული სამეფოს დასახმარებლად, ყველაფერს გავაკეთებთ. თქვენთან ვართ. ღმერთმა დაგლოცოთ", წერს ტრამპი ტვიტერზე.

საინფორმაციო სააგენტოებთან საუბრისას, თვითმხილველები დაჭრილ და დაშავებულ ადამიანებზე საუბრობენ. მათი თქმით, რამდენიმე ადამიანს ყელი ჰქონდა გამოჭრილი და დახმარებას ითხოვდნენ, ხოლო რამდენიმე ადამიანი უგონოდ იმყოფებოდა და სხეულზე ჭრილობების კვალი ეტყობოდა.

დაღუპულთა და დაშავებულთა რაოდენობის შესახებ ოფიციალური ინფორმაცია ჯერ-ჯერობით არ ვრცელდება.

განახლება: როგორც BBC The Sun-ზე დაყრდნობით იუწყება, პოლიციამ ორი თავდამსხმელი მოკლა, ხოლო სამს ჯერ კიდევ ეძებენ.

ამავდროულად, Daily Mail-ის კორესპონდენტი იტყობინება, რომ რამდენიმე წუთის წინ ბორო მარკეტში სამი აფეთქების ხმა გაისმა. ჯერ-ჯერობით დაუდგენელია რა აფეთქდა, არის თუ არა მსხვერპლი ან იყო თუ არა ეს აფეთქებები პოლიციის ოპერაციის შედეგი.

განახლება: იმავე ჟურნალისტისა და რამდენიმე თვითმხილველის თქმით, რამდენიმე წუთის წინ კიდევ ერთი აფეთქების ხმა გაისმა, რომელიც წინა სამთან შედარებით ბევრად უფრო ხმამათალი და მასიური იყო. აფეთქებების შესახებ ოფიციალური ინფორმაცია პოლიციას ან სხვა ძალოვან სტრუქტურას ჯერ არ გაუვრცელებია.

განახლება: The Sun-ის ინფორმაციით, ლონდონის ტერორისტული აქტის შედეგად დაიღუპა 7 და დაშავდა ათობით ადამიანი.

განახლება: The Sun-ის ერთ-ერთი რედაქტორის განცხადებით, მას პოლიციამ დაუდასტურა, რომ ლონდონში მომხდარი აფეთქბები პოლიციის მიერ იყო კონტროლირებული.

BBC-ის ინფორმაციით, ეს არის ის ავტომობილი, რომელიც ლონდონის ხიდზე რამდენიმე ადამიანს დაეჯახა.