აშშ-ს ელჩმა საქართველოში, იან კელიმ აზერბაიჯანელი ჟურნალისტის, აფგან მუხტარლის საქმის შესახებ განაცხადა, რომ იგი საქართველოს მთავრობას გაესაუბრა ამ თემაზე და პირობა მიიღო რომ ამ საქმეს აუცილებლად გამოიძიებენ:

"ეს ძალიან სერიოზული ბრალდებაა, ჩვენ გვქონდა შეხვედრები მთავრობის წარმომადგენლებთან. ისინი აცნობიერებენ ამ საქმეზე შექმნილი სიტუაციის სერიოზულობას და დაგვპირდნენ რომ აუცილებლად გამოიძიებენ ამ საკითხებს. აგრეთვე, დაგვპირდნენ, რომ იმ აზერბაიჯანელ მოქალაქეებს, რომლებიც საქართველოში ცხოვრობენ საფრთხე არ დაემუქრებათ".

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.